Amandyq Batalov aýǵan soǵysy ardagerleriniń shaǵymyna qulaq túrdi
TALDYQORǴAN. QazAqparat - Almaty oblysynyń turǵyny, aýǵan soǵysynyń ardageri Ashat Qasenov úsh jyldan beri protezge qol jetkize almaı júr. Bir aıaǵynyń tizeden tómen tusynan aıyrylǵan ınternatsıonalıst-jaýynger búgin basyndaǵy qıyndyqty oblys ákimine baıandap berdi, dep habarlaıdy QazAqparat tilshisi.
Eki márte Qyzyl juldyz ordeniniń ıegeri, ІІ dárejeli «Aıbyn» ordenimen marapattalǵan Ashat Qasenov 18 jasynda aýǵan soǵysyna attanǵan. Bir jyldan keıin bir aıaǵynan aıyrylyp elge qaıtqan. Qazir taldyqorǵandyq turǵyn úsh jyldan beri ózine tıesili protezge qol jetkize almaı otyr. Qalalyq jumyspen qamtý jáne áleýmettik baǵdarlamalar bólimine san márte barsa da, máselesi sheshilmegen.
«Bizge jyl saıyn protez berilý kerek. Mine úsh jyl boldy ol zatty ala almaı júrmin. Qalalyq jumyspen qamtý jáne áleýmettik baǵdarlamalar bólimindegiler tender oınatylady, aqsha bóliný kerek dep shyǵaryp salady. Qazir eski protezben júrmin. Tizemniń tómen tusynan aıaǵym joq. Tizem qajalyp, qanaıtyn boldy», dep janaıqaıyn oblys basshysyna jetkizgen ardagerdiń máselesi sheshiletin boldy.
Ardagerdiń jaǵdaıyn tolyq tyńdaǵan Amandyq Batalov jaýapty mamandarǵa naqty tapsyrma berdi.
«Qarańdar, keýdesi tolǵan orden. Eki márte Qyzyl juldyz ordeniniń ıegeri, ІІ dárejeli «Aıbyn» ordenimen marapattalǵan. Nege protez ala almaı júr. Mindetti túrde osyndaı jaıttardyń barlyǵyna ákim aralasý kerek pe? Máselesin sheship, sońynan maǵan baıandap berińder», - dedi óńir basshysy.
Amandyq Batalovtyń aýǵan soǵysy ardagerlerimen kezdesý barysynda ózge de máseleler kóterildi. Basym bóligi baspana taýqymetin alǵa tartty. Qazirgi ýaqytta Taldyqorǵan qalasy boıynsha 166 adam baspana kezeginde tur. Kezek tym baıaý jyljıdy dep, ardagerler nazyn bildirdi. Jalpy Almaty oblysynan aýǵan soǵysyna 3702 adam attanǵan. 773 jaýynger soǵysta qaza tapqan. Qazirgi tańda Jetisý jerinde 2500 jýyq aýǵan soǵysynyń ardagerleri turyp jatyr.
Sondaı aq jıyn barysynda oblys ákimi óńir boıynsha atqarylyp jatqan jumystardy baıandap berdi. Kezdesý sońynda estelik sýretke tústi.
