Amandyq Batalov Almaty oblysynda 65 myń jańa jumys ornyn ashpaq
«Memleket basshysy atap ótken tótenshe jaǵdaı kezinde halyqty, bıznesti qoldaý sharalary ekonomıkadaǵy oń serpindi saqtaýǵa jáne jumyspen qamtamasyz etýge múmkindik beredi. Oblys boıynsha 156 myń adam jumyspen qamtylǵan. Іri jáne orta kásiporyndarda óndiris kóleminiń tómendeýi jáne qyzmetkerlerdi bosatý jaǵdaılary tirkelmegen. Jumyspen qamtýdyń jańa jol kartasyna 1 trln teńge bólý týraly sheshim jumys oryndaryn qurýǵa úlken kómek berdi. Memlekettik saraptama qorytyndysy alynǵan jobalyq-smetalyq qujattamanyń arqasynda oblysta 22,8 myń jumys ornyn quryp otyrmyz. 977 jobany iske asyrýǵa 109,2 mlrd teńge bólindi. Onyń ishinde 58,9 mlrd teńgesi nemese 54 paıyzy áleýmettik-mádenı salanyń 429 jobasyn iske asyrýǵa baǵyttalady», - dedi oblys basshysy.
Onyń aıtýynsha, atalǵan jol kartasynyń arqasynda óńirde bıyl qosymsha taǵy 7 mektep salynady. Jalpy osy jyly barlyǵy 23 mektep salynbaq.
«Bul oblys úshin mańyzdy másele. Óıtkeni, bizdiń oblysta qazirgi ýaqytta úsh aýysymdy 32 mektep bar. Munan bólek 5 aýyldyq dárigerlik ambýlatorııa salýdy josparlap otyrmyz. 53 eldi mekende sýmen jabdyqtaý nysandaryn qaıta jańǵyrtý men jóndeý, 84 eldi mekende abattandyrý, 220 eldi mekende 500 shaqyrym jol jóndeý júrgiziledi. Oblysta jol kartasy boıynsha jumystar atqarylǵan. Biraq mundaı kólemde qarajat alǵash ret bólinip otyr. Sonyqtan bizdiń mindetimiz - olardy ýaqytynda ári sapaly ıgerý, jumyspen qamtý máselelerin sheshý», - dedi óńir basshysy.
Oblys ákimi munan bólek «Eńbek» baǵdarlamasy aıasynda jumyspen qamtýdyń belsendi sharalarymen 22 myń adamdy qamtý josparlanyp otyrǵanyn aıtty.
«Sonymen qatar jekemenshik ınvestorlar tartý esebinen 367 mlrd teńgege 75 nysan iske qosylyp, 5 myńnan astam jumys orny ashylady. Nátıjesinde oblys boıynsha qoldaý sharalarynyń arqasynda jumystan shyǵarylǵan jáne jumyssyz turǵyndar úshin jyl boıy 65 myń jumys orny qurylady», - dedi Amandyq Batalov.
