Amandyq Batalov AES qurylysy jaıly: Bári sóz kúıinde qaldy
NUR-SULTAN. QazAqparat – Almaty oblysynda AES qurylysy jaıly eshqandaı talqylaý da, aralaý da bolǵan emes. Óńir basshysy Amandyq Batalov osylaı dep málimdedi, dep habarlaıdy QazAqparat tilshisi.
«Birden aıtaıyn: ıá, ol týraly áńgime boldy. Birneshe nusqa bolǵanyn da bilesizder. Almaty oblysynda, Jambyl óńirinde, Balqash kóliniń mańynda – birneshe nusqa qarastyrylǵan edi. Taǵy bir nusqa retinde Shyǵys Qazaqstan oblysy aıtyldy. Biraq, bunyń bári sóz kúıinde kúıinde qaldy. Eshqandaı jerdi qarastyrý, talqylaý, arnaıy baryp jerdi kórý – munyń bári bolǵan emes. Ony ashyq aıta alamyn», - dedi Almaty oblysynyń ákimi Ortalyq kommanıkatsııalar qyzmetinde ótken baspasóz máslıhatynda.
Eske sala ketsek, osy jyldyń sáýirinde Semeı qalasynyń zııaly qaýym ókilderimen kezdesken Memleket basshysy Qasym-Jomart Toqaev atom elektr stansasynyń qurylysyna qatysty oıymen bólisken bolatyn. Memleket basshysy el halqynyń basym bóliginiń pikiri eskerilmesten AES qurylysy týraly sheshim qabyldanbaıtynyn aıtqan edi.
Óz kezeginde Energetıka mınıstri Qanat Bozymbaev «Qazaqstanda atom elektr stansasy salyna ma?» degen suraqqa jaýap berip, «halyq narazy bolsa, salmaımyz» degen bolatyn.
