Jasandy ıntellekt bilim berý júıesine qajet mańyzdy múmkindikterge jol ashady
ASTANA. KAZINFORM – Elimizdiń barlyq óńirinen kelgen 300-den astam mektep muǵalimi, kolledjder men JOO oqytýshylary, stýdentter, ǵalymdar, bilim berý salasynyń ardagerleri men sarapshylar qaýymy «AMANAT» partııasynyń «Muǵalim Talks» keıs-platformasynyń ekinshi otyrysynda bas qosty. Talqylaý taqyryby – jasandy ıntellekt dáýirindegi muǵalimniń róli men bilim berý salasyndaǵy ınnovatsııa. Sondaı-aq erekshe kózge túsken pedagogterge partııalyq jáne vedomstvolyq nagradalar tabystaldy.
Sóz basynda Májilis spıkeri, «AMANAT» partııasynyń tóraǵasy Erlan Qoshanov muǵalimderdi ótken kásibı merekesimen quttyqtap, pedagogtardyń qoǵam ómirindegi jáne el damýyndaǵy aıryqsha róline toqtaldy. Ol «AMANAT-tyń» negizgi tiregi pedagogtar ekenin atap ótti, sebebi Qazaqstandaǵy 600 myń muǵalimniń 260 myńǵa jýyǵy – partııa músheleri.
– Bizdiń aldymyzda turǵan negizgi mindet – adal, bilimdi, ádiletti azamat tárbıeleý. Bul protsess úıden bastalyp, mektepte jalǵasyn tabady. Ár balanyń otanshyl bolyp ósýi, úlkenge qurmet, kishige izet kórsete bilýi, aınalasyna, qorshaǵan ortaǵa jaýapkershilikpen qaraýy mańyzdy. Prezıdent aıtqandaı, ár adam ózi adal bolsa, zańdy qurmettese ǵana Ádiletti Qazaqstandy qura alamyz. Al ondaı býyn tárbıeleý – muǵalimderdiń tarıhı mıssııasy. Osy iste partııa árdaıym sizdermen birge bolady, – dedi.
Partııa tóraǵasy tsıfrlandyrý jáne jasandy ıntellektti damytý máselesine erekshe nazar aýdardy. Ol Memleket basshysy Qasym-Jomart Toqaev óz Joldaýynda Qazaqstandy úsh jyl ishinde jappaı tsıfrlyq elge aınaldyrý týraly óte aýqymdy mindet qoıǵanyn eske saldy. Bul bilim berý júıesine qajet mańyzdy múmkindikterge jol ashady.
– Mektep tek damý úderisine ilesip qana qoımaı, ony basyp ozýǵa tıis. Másele endi jasandy ıntellekt bilim berý júıesinde qajet pe, joq pa degen saýalda emes, ony tıimdi engizýde. Bir nárseni únemi este saqtaý kerek – muǵalim mekteptiń júregi bolyp qala beredi. Jasandy ıntellekt muǵalimdi almastyrmaıdy, kerisinshe ony basy artyq jumystan aryltyp, eń negizgi mindetin – oqýshyǵa bilim berý, tárbıeleý jáne tulǵalyq qasıetin qalyptastyrý isin alańsyz atqarýyna múmkindik berýge tıis, – dedi Erlan Qoshanov.
Májilis spıkeri Memleket basshysynyń bilim berý júıesin qoldaýǵa qatysty saıasaty men onyń tapsyrmasy boıynsha «Pedagog mártebesi týraly» Zańnyń qabyldanýy oń nátıje bergenine nazar aýdardy. Keıingi tórt jylda bilim berý salasyna bólingen qarjy kólemi úsh ese artty. Muǵalimderdiń jalaqysy eki ese ósti. Bıyldyń ózinde mektepke on myńnan astam jas maman keldi. Olardyń arasynda joǵary ball jınaǵan túlekter men «Altyn belgi» ıegerleri bar. Halyqaralyq zertteý nátıjeleri muǵalimderdiń basym kópshiligi óz jumysyna kóńili tolatynyn kórsetti.
Óz kezeginde, partııa pedagogterge belsendi qoldaý kórsetip keledi. Májilistegi partııa fraktsııasynyń qoldaýymen halyqaralyq ǵylymı konkýrstardyń jeńimpazdaryn tárbıelegen pedagog-tálimgerlerge arnaıy tólem qarastyrylatyn zań maquldandy. Mundaı oqýshylar endi «Bolashaq» baǵdarlamasy boıynsha grantqa úmitker bola alady. Zańnamalyq deńgeıde mektep qabyrǵasynda tamaqtandyrý barysyn baqylaýdy kúsheıtý, balabaqshalar men bilim berý uıymdaryna jer ýchaskelerin bólý, alǵashqy áskerı daıyndyq páni muǵalimderiniń mártebesin arttyrý boıynsha sharalar qabyldandy.
Erlan Qoshanov ustazdar qaýymyn tolǵandyrǵan máseleler de az emes ekenin atap ótti. Olardyń qatarynda, mektep qabyrǵasyndaǵy shamadan tys qaǵazbastylyq, túrli is-sharada kezekshilik etý, mektep chattary men áleýmettik jelilerdi júrgizý júktemesi, sondaı-aq ustazǵa tán emes ózge de mindetter bar. Sondaı-aq muǵalimderdiń qaýipsizdigin arttyrý, olardy qorlaý men psıhologııalyq qysymnan tıimdi qorǵaý normalaryn kúsheıtý qajet. Muǵalimniń eń negizgi mindeti – balalarǵa bilim berý. Ustazdardy odan ózgesi alańdatpaýy kerek.
Partııa muǵalimderdi jańa tehnologııalarmen jáne eń aldymen, jasandy ıntellektpen belsendi jumys isteýge daıyndaıdy. Atap aıtqanda, muǵalimderge jańa tehnologııalardy ıgerýge kómektesetin tegin kýrstar men ádistemelik materıaldary bar tsıfrlyq platforma qurý josparlanýda. Sondaı-aq alǵashqy ped-hakaton ótkiziledi. Onda muǵalimder JI-di mektep qabyrǵasynda qoldanýǵa qatysty óz ıdeıalaryn usyna alady. Al úzdik ustazdar shetelde taǵylymdamadan ótý múmkindigine ıe bolady. Sonymen qatar muǵalimder Tsıfrlyq kodeksti ázirleý jumysyna tartylady. Osy arqyly olardyń praktıkalyq tájirıbesi bilim berý protsesine qatysýshylardyń múddesi qujatta kórinis tabýyna kómektesedi.
Іs-shara barysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev pen Oqý-aǵartý mınıstri Juldyz Súleımenova sóz sóıledi. Sonymen qatar «Muǵalim Talks» qatysýshylary ózderiniń kásibı turǵyda qalyptasý tarıhymen bólisti jáne áriptesterimen birge kásibı syn-tegeýrinderdi talqylady.
Almaty oblysy Uzynaǵash aýylyndaǵy fızıka pániniń muǵalimi Baqytáli Daýleshıar oqýshylarmen birge qolda bar zattardan qural-saıman, tipti jasandy qol protezin jasap, balalardy qalyptan tys oılaýǵa úıretetinin, ǵylymǵa degen súıispenshilikterin oıatatynyn aıtty. Aqmola oblysy Arshaly aýylyndaǵy tarıh pániniń muǵalimi Olga Davydova STEM men jasandy ıntellekt ádisterin paıdalaný arqyly tarıh ǵylymyna jan bitirýge bolatynyn kórsetti. Túrkistannan kelgen qazaq tili men ádebıeti pániniń muǵalimi Ámálııat Arqalyq pedagogty qajetsiz qaǵazbastylyqtan aryltý úshin tsıfrlyq quraldardy paıdalanýdy usyndy. Astana qalasyndaǵy ınformatıka pániniń muǵalimi Saltanat Sadyqova jasandy ıntellektti paıdalana otyryp, tapsyrmalardy shaǵyn jobalarǵa aınaldyrýda. Sol arqyly oqýshylar óz sheshimin negizdeýge jáne qorǵaýǵa úırenedi.
Semeı qarjy-ekonomıkalyq kolledji dırektorynyń orynbasary Ashat Muhanov jumysshy mamandyqtar ózgeristerdiń alǵy shebinde turatynyn atap ótti. Sebebi jasandy ıntellekt oqý sheberhanalarynda mańyzdy quralǵa aınalýda. Qostanaıdan kelgen tarıh pániniń muǵalimi ári erekshe balanyń anasy Uljan Baıgenjına qyzmet barysynda sharshap-shaldyǵý máselesine jáne pedagogtardyń ózara qoldaý kórsetý isin keńeıtý qajet ekenine nazar aýdardy.
Atyraýdan kelgen hımııa pániniń muǵalimi Ibrahım Baqdáýletuly oqýshylardy olımpıadaǵa daıyndaý kezinde JI qoldanýdyń tájirıbelik mysaldarymen bólisti. Jetisý oblysy Jylandy aýylyndaǵy mamandandyrylǵan lıtseı-ınternatynyń dırektory Elmıra Rapılova Almatydan týǵan aýylyna oralyp, joǵary oqý oryndarymen jáne demeýshilermen áriptestik ornata otyryp, óz kolledjinde ınjenerlik bilim berý sapasyn qalaı arttyrǵanyn aıtty. Otyrys moderatory – belgili telejúrgizýshi Saǵynysh Ábikeı.
Іs-shara sońynda Erlan Qoshanov birqatar qatysýshyǵa «Ustaz – ult aınasy» partııalyq nagradasyn tabystady. Bıyldan bastap atalǵan nagradamen jyl saıyn elimizdiń úzdik pedagogtary marapattalady. Sondaı-aq kásibı qyzmeti barysynda elge sińirgen eńbegi úshin muǵalimderge Premer-Mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev pen Oqý-aǵartý mınıstri Juldyz Súleımenova vedomstvolyq nagradalar tabystady.
Aıta keteıik, Almatyda Ustazdar kúni qarsańynda eki myńnan astam oqýshy qatysqan aýqymdy fleshmob ótti.