«Amanat» jáne «Qunanbaı» fılmderi Bolgarııadaǵy halyqaralyq kınofestıvalde kórsetiledi
ALMATY. QazAqparat - Sh.Aımanov atyndaǵy «Qazaqfılm» kınostýdııasy túsirgen «Amanat» jáne «Qunanbaı» fılmderi 9-shy Halyqaralyq MENAR kınofestıvaliniń «Fokýs» baǵdarlamasy aıasynda Eýropa kórermeniniń nazaryna usynylatyn boldy.
Halyqaralyq kınofestıval qańtardyń 12 men 29 aralyǵynda Bolgarııa astanasy Sofııada ótedi.
Qazaqstandyq kartınalar 14 qańtar kúni «Evrosınema» kınoteatrynda aǵylshyn tilindegi sýbtıtrlarmen kórsetiletin bolady.
Qazaqstan jáne Orta Azııa elderinen shyqqan alǵashqy tarıhshy, kórnekti ǵalym Ermuhan Bekmahanov týraly «Amanat» tarıhı lentasy prokatqa ótken jyldyń mamyrynda shyqqan bolatyn. Belgili rejısser Satybaldy Narymbetovtiń fılmi atalmysh kartına «Oskar» premııasynyń «Eń úzdik shet tildegi fılm» tańdalymyna usynylǵan.
Doshan Joljaqsynovtyń uly oıshyl Abaıdyń ákesi Qunanbaı ómiri jaıly baıandaıtyn «Qunanbaı» atty kórkem fılmi qazaqstandyq prokatqa 2015 jyly shyqqan. Fılm avtorlary otandyq «Tulpar» kınopremııasynda úzdik atandy.
Atap aıtsaq, basty róldi somdaǵan Doshan Joljaqsynov «Úzdik er adam róli úshin» nomınatsııada jeńiske jetip, Rýstam Odınaev «Úzdik qoıýshy sýretshi» jáne Tólegen Muhamedjanov «Úzdik kompozıtor» atandy. Sondaı-aq, kartına úzdik stsenarıı premııasyn da jeńip aldy. Stsenarıı avtorlary - Talasbek Ásemqulov jáne Doshan Joljaqsynov.
Sonymen qatar, 2016 jyldyń qyrkúıeginde fılm XII Qazan halyqaralyq musylman kınosy festıvaliniń konkýrstyq baǵdarlamasynda kórsetilip, Ýfada ótken III halyqaralyq ulttyq jáne etnıkalyq kıno «Kúmis Aqbozat» festıvalinde Ámir Ábdirazaqov atyndaǵy «Ulttyq rýh» júldesin ıelengen.
QR Táýelsizdik kúni qarsańynda Elbasy 2016 jyldyń ádebıet pen óner salasy boıynsha Memlekettik syılyqty úlestirdi. Jarlyqqa sáıkes premııa stsenarıı avtorlarynyń biri, rejısser Qazaqstannyń halyq artısi Doshan Joljaqsynovqa, qoıýshy sýretshi Rýstam Odınaevqa, sonymen qatar akterler Nýrsıfat Salyqovaǵa jáne Aıdos Bektemirge berildi.
Aıta keteıik, Sofııadaǵy MENAR halyqaralyq kınofestıvali Balqan túbegindegi eń iri mádenı oqıǵalardyń biri bolyp sanalady. Festıval jyl saıyn kórermen qaýymdy musylman áleminiń dástúri men mádenıetin pash etetin fılmdermen tanystyrady. Festıvaldiń baǵdarlamasy aıasynda Qıyr Shyǵysta, Orta Azııa elderi jáne Soltústik Afrıkada túsirilgen úzdik kórkem, derekti jáne qysqametrajdy fılmder de kórsetiledi.
