«AMANAT» «Ádilet» partııasyna qosylatyn boldy

— Elmen birge ósken partııa úshin taǵy bir kezeń aıaqtalyp jatyr. Alǵa jyljý úshin batyl sheshimder kerek. Eskiden arylmaı, jańany qurý múmkin emes. Biz jaqsy jumys istep, barlyq maqsat-mindetti oryndaǵanymyzdy taǵy bir atap óteıin. Ashyǵyn aıtqanda, halyqpen adal jáne tike dıalog qursaq ta, bizdi aldyńǵy partııamen baılanystyratyn keı pikirler áli de bar. Mundaı nárse úlken tarıhy bar kez-kelgen saıası kúshte bolady. Sondyqtan Memleket basshysy birliktiń mańyzy jóninde aıtyp júrgen qazirgideı shaqta batyl sheshim qabyldap, tarıhymyzdyń jańa paraǵyn ashýymyz kerek. Bizdiń partııa árdaıym «ózgeris ózimizden bastalady» degen qaǵıdany ustanady. Qazir ýaqyt talabyna, memleket múddesine, qoǵamnyń suranysyna saı qadam jasaýymyz qajet. Búginde memleketke bóliný emes, birigý núkteleri kerek. Osyndaı jaýapty sátte resýrstarymyzdy jańa saıası partııa «Ádiletpen» biriktirýimiz tıis. Biz ustanymdarymyz ben ıdeıalarymyzdan bas tartpaımyz, kerisinshe olardy kúsheıte túsemiz. Múmkindikterimizdi keńeıtemiz jáne damýdyń jańa kezeńine ótemiz. Álemdik tájirıbede memleket múddesi úshin partııalardyń birigýi tájirıbesi, mysaly kóp, — dedi Sezde Parlament Májilisiniń Tóraǵasy, «AMANAT» partııasynyń Tóraǵasy Erlan Qoshanov.

Sonymen qatar, ol bul sheshim sanaly saıası qadam ekenin atap ótti.

— «Amanat» — babalardyń ósıeti jáne keleshek urpaqtar aldyndaǵy jaýapkershilik. Al «Ádilet» — ádildik, ıaǵnı kúshti ári zamanaýı memlekettiń negizi, — dedi Erlan Qoshanov.

Aıta keteıik, buǵan deıin «AMANAT» partııasy Saıası keńesiniń málimdemesin jarııalaǵanbyz.