«Amanat» partııasy Oljas Bektenovti Premer-Mınıstr laýazymyna usyndy

ASTANA. KAZINFORM — Memleket basshysyna «Amanat» partııasynyń atynan Premer-Mınıstrdiń kandıdatýrasy usynyldy. Bul týraly Aqordanyń baspasóz qyzmeti habarlady. 

Prezıdent Qasym-Jomart Toqaevqa Parlament Májilisiniń jáne «Amanat» partııasynyń tóraǵasy Erlan Qoshanov Premer-Mınıstr qyzmetine Oljas Bektenovtiń kandıdatýrasyn usyndy. Qoldanystaǵy zańnamaǵa sáıkes, Memleket basshysy usynylǵan kandıdatýrany Májilistegi partııalardyń fraktsııalarymen jýyq arada talqylaıdy. 

Oljas Abaıuly Bektenov 1980 jyly 13 jeltoqsanda Almaty qalasynda týǵan.

Qazaq memlekettik zań akademııasyn (2001 j.) úzdik bitirgen, mamandyǵy «Zańger».

ІІ dárejeli «Aıbyn» (2014 j.) jáne «Dańq» (2021 j.) ordenderimen nagradtalǵan.

2002-2005 jyldary Almaty qalasy Ádilet basqarmasy bóliminiń bas mamany.

2005-2006 jyldary QR Premer-Mınıstri Keńsesiniń zań bóliminiń sarapshysy, bas sarapshysy.

2006-2009 jyldary QR Prezıdenti Ákimshiliginde jumys jasady.

2009-2012 jyldary QR Ádilet mınıstrliginiń Tirkeý qyzmeti jáne quqyqtyq kómek kórsetý komıteti tóraǵasynyń orynbasary.

2012-2014 jyldary QR Ekonomıkalyq qylmysqa jəne sybaılas jemqorlyqqa qarsy agenttiginiń (qarjy polıtsııasy) ortalyq apparatynda departament bastyǵy.

2015-2016 jyldary Astana qalasy ákiminiń apparat basshysy, QR Prezıdenti Ákimshiligi Basshysy Hatshylyǵynyń meńgerýshisi.

2016-2017 jyldary Sybaılas jemqorlyqqa qarsy is-qımyl Ulttyq bıýrosynyń (Sybaılas jemqorlyqqa qarsy qyzmet) Astana qalasy boıynsha departamentiniń basshysy.

2017-2018 jyldary Aqmola oblysy ákiminiń orynbasary.

2018-2019 jyldary Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi Tóraǵasynyń orynbasary.

2019-2022 jyldary Qazaqstan Respýblıkasynyń Sybaılas jemqorlyqqa qarsy is-qımyl Agenttigi Tóraǵasynyń birinshi orynbasary.

2022 jyldyń aqpanynan bastap Qazaqstan Respýblıkasynyń Sybaılas jemqorlyqqa qarsy is-qımyl agenttiginiń tóraǵasy qyzmetin atqardy.

Aıta keteıik, keshe Memleket basshysy «Qazaqstan Respýblıkasynyń Úkimeti týraly» jarlyqqa qol qoıdy.

Prezıdent keńesshisi - baspasóz hatshysy Berik Ýálı Úkimet basshysyn taǵaıyndaý rásimi jóninde pikir bildirdi. 

Qazaqstan Respýblıkasy Premer-Mınıstri mindetin ýaqytsha atqarý Roman Vasılevıch Sklıarǵa júkteldi.