«AMANAT» partııasynyń atsalysýymen elimizdegi ár aýdanda IT-hub qurylady
ASTANA. KAZINFORM - «AMANAT» partııasynda tsıfrlyq damý jáne jasandy ıntellekt máseleleri jónindegi respýblıkalyq partııalyq keńestiń keńeıtilgen otyrysy ótti.
Otyrystyń negizgi taqyryby – Tsıfrlandyrý jáne jasandy ıntellekt jylynyń basymdyqtaryn júzege asyrý, sondaı-aq memleketti tsıfrlyq turǵyda jańǵyrtý jáne azamattardyń tsıfrlyq saýatyn arttyrý boıynsha naqty qadamdar jasaý.
Talqylaý barysynda IT-qoǵamdastyq partııalastardyń el aýmaǵyndaǵy ár aýdanda óz IT-habyn qurý ıdeıasyna qoldaý bildirdi.
Kezdesýge qatysýshylar Prezıdent óz Joldaýynda jáne Ulttyq quryltaıdyń V otyrysynda barlyq salada ınnovatsııalyq tsıfrlyq sheshimder men jasandy ıntellektini engizý boıynsha aýqymdy mindetter qoıǵanyn atap ótti.
Óz kezeginde, Májilis Spıkeri, «AMANAT» partııasynyń Tóraǵasy Erlan Qoshanov partııa Prezıdent saıasatyn júzege asyrý isine belsendi atsalysyp kele jatqanyn atap ótti. Búginde elimiz tsıfrlandyrý baǵytynda joǵary kórsetkishterge qol jetkizdi – BUU ındeksine sáıkes, Qazaqstan elektrondyq úkimetti damytý deńgeıi boıynsha 24-orynda tur.
-Tsıfrlandyrý men jasandy ıntellekt – tek salalyq másele ǵana emes, tutas eldiń damýyna yqpal etetin aýqymdy, serpindi baǵyt. Memleket basshysynyń ózi bul saladaǵy irgeli isterge tikeleı bastamashy bolyp, erekshe baqylaýynda ustap otyr. Jańa tsıfrlyq tehnologııalar men jasandy ıntellekt halqymyzǵa, elimizdiń bolashaǵyna jumys isteýi kerek. Ár azamat, ár otbasy, kúlli qoǵam onyń paıdasyn sezinýi qajet. «AMANAT» partııasy Prezıdentimizdiń qoǵamdyq-saıası tiregi retinde osy jumystyń aldyńǵy shebinde júrýge tıis, – dedi ol.
Májilis Spıkeri «AMANAT» partııasy jańa tsıfrlyq mádenıetti qalyptastyrýǵa baǵyttalǵan birqatar bastamany júıeli júzege asyryp jatqanyn atap ótti. Atap aıtqanda, «Tsıfrlyq qoǵam» jobasy elimizdiń barlyq óńirin qamtyp, tsıfrlyq saýattylyqty arttyrýǵa, sondaı-aq azamattardy tsıfrlyq tehnologııalardy kúndelikti ómirde qaýipsiz ári sanaly túrde qoldanýǵa úıretý baǵytynda qolǵa alynyp otyr. Joba aıasynda turǵyndardyń áleýmettik turǵyda osal tobyna – zeınetkerlerge, kópbalaly analarǵa, jumyssyz azamattarǵa jáne erekshe qajettiligi bar adamdarǵa erekshe nazar aýdarylady.
Ótinishterdi óńdeýdiń biryńǵaı tsıfrlyq júıesin engizý jáne keńes berý maqsatynda chat-bottardy paıdalaný arqyly «Qaryzsyz qoǵam» jobasy tyń serpin aldy. Tek byltyrdyń ózinde bul joba aıasynda 800 myńnan astam adam oqýdan ótip, zańgerlik qoldaý kórsetildi.
Sonymen qatar «AMANAT» partııasy fraktsııasynyń depýtattary Tsıfrlyq kodeks pen «Jasandy ıntellekt týraly» Zań ázirleýge bastamashy boldy. Bul qujattar Qazaqstanǵa jasandy ıntellektini, platformalyq ekonomıkany jáne aýqymdy derektermen jumys isteýdi damytý úshin zamanaýı quqyqtyq negiz qalyptastyrýǵa múmkindik berdi.
Talqylaý barysynda qatysýshylar «AMANAT» partııasy tsıfrlyq tehnologııalar men jasandy ıntellektini engizý isinde memleket, qoǵam, sarapshylar men bıznestiń kúsh-jigerin biriktirýge tıis ekenin atap ótti. Osy maqsatta partııa janynan tsıfrlyq komıssar pozıtsııasyn qurý týraly usynys aıtyldy. Bul laýazymǵa Májilis depýtaty Ekaterına Smyshlıaeva usynyldy.
Mundaı qoǵamdyq laýazym tsıfrlyq ortada azamattardyń quqyǵyn qorǵaý tetigine aınalyp, jańa tsıfrlyq jaǵdaıda árdaıym adam jaǵynda bolady. Tsıfrlyq komıssar elimizdiń barlyq óńirinde IT salasyndaǵy daryndy jastardy qoldaý jumysyn úılestirip, shalǵaı aýyldardy ınternetpen qamtý barysyna baqylaýdy kúsheıtedi.
Óz kezeginde, Premer-Mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev memlekettik jáne qarjy sektorlaryndaǵy tsıfrlyq transformatsııanyń joǵary qarqynyn atap ótti. Ol turǵyndardyń tsıfrlyq saýatyn arttyrý maqsatynda Jasandy ıntellekt mınıstrligi men Astana Hub el aýmaǵynda oqytý kýrsyn ótkizý isinde partııaǵa qoldaý kórsetýge ázir ekenin málimdedi.
Otyrys barysynda birqatar mazmundy usynys aıtyldy. Máselen, halyqaralyq IT-sarapshy Andreı Bıklemıshev tsıfrlandyrý eń aldymen derekter sapasy men kadrlyq áleýetke tikeleı táýeldi ekenin atap ótip, óńirlerde áli de derekterdi qolmen engizý tájirıbesi men maman tapshylyǵy saqtalyp otyrǵanyna nazar aýdardy. Qazaqstannyń IT-qaýymdastyǵynyń tóraǵasy Aıymgúl Ábilova ınvestıtsııalyq ahýaldy jaqsartý úshin memlekettik-jekemenshik áriptestik tetikterin keńeıtý jáne saladaǵy ekonomıkalyq daýlardy qylmystyq sıpattan aryltý qajet ekenin aıtty. Qostanaı oblysy aqparattandyrý basqarmasynyń basshysy Azamat Kashıevtiń pikirinshe, qalalardaǵy iri ózgerister aldyn ala tsıfrlyq ortada modeldenip, óńirdiń biryńǵaı tsıfrlyq arhıtektýrasyna engizilýi qajet. Solaı bola tura, «aqyldy qalalar» men «aqyldy óńirler» tujyrymdamalary ár aýmaqtyń ereksheligin eskerip, beıimdeýge bolatyn úlgilik tsıfrlyq sheshimder kitaphanasyna súıenýge tıis.
Kezdesý qorytyndysy boıynsha Qazaqstanda tsıfrlandyrý men jasandy ıntellektini damytýǵa qosqan úlesi úshin partııa múshelerine, seriktester men sarapshylarǵa alǵys hattar tabystaldy.
Іs-sharaǵa Májilis depýtattary, salalyq vedomstvolardyń ókilderi, sarapshylar jáne tsıfrlyq jobalardyń jetekshileri qatysty. Onlaın formatta óńirler men partııa fılıaldarynyń ókilderi talqylaýǵa qosyldy.
Osyǵan deıin «AMANAT» partııasy taý týrızmin damytý jobasyn iske qosqany týraly jazdyq.