AMANAT partııasyndaǵy bos mandat Nursultan Baıtilesovke berildi
ASTANA. KAZINFORM – AMANAT partııasy Saıası keńesi Bıýrosynyń qaýlysymen Parlament Májilisi depýtatynyń partııalyq tizim boıynsha bos mandaty Baıtilesov Nursultan Tólenulyna berildi. Bul týraly partııanyń baspasóz qyzmeti málim etti. Tıisti sheshim QR Ortalyq saılaý komıssııasyna jiberildi.
Nursultan Baıtilesov 1991 jyly týǵan. M. Áýezov atyndaǵy Ońtústik Qazaqstan memlekettik ýnıversıtetin «quqyqtaný» mamandyǵy boıynsha, Óńirlik áleýmettik-ınnovatsııalyq ýnıversıtetin «ekonomıka jáne bıznes» mamandyǵy boıynsha bitirgen. Zań ǵylymdarynyń magıstri.
2009 jyldan bastap Astana qalasy Almaty aýdandyq sotynyń jetekshi mamany, bas maman-sot otyrysynyń hatshysy, sot prıstavy, bas mamany, Atyraý, Pavlodar oblystyq sottarynyń keńsesi basshysynyń orynbasary, Joǵarǵy Sot janyndaǵy Sottardyń qyzmetin qamtamasyz etý departamentiniń bas konsýltanty bolyp qyzmet atqarǵan.
2016-2018 jyldary Joǵarǵy Sot janyndaǵy Sottardyń qyzmetin qamtamasyz etý departamentiniń halyqaralyq baılanystar jáne protokol bólimi meńgerýshisiniń orynbasary bolǵan.
2020 jyly Nursultan Tólenuly Baıtilesov Joǵarǵy Sot apparaty basshysynyń orynbasary qyzmetinde boldy. Ol jas kadrlar rezervi quramynda bolǵan.
