«AMANAT» partııasy halyq pen memlekettiń múddesin qorǵaıdy – Erlan Qoshanov

ASTANA. KAZINFORM - Májilistegi VIII shaqyrylymynyń III sessııasynda atqarylǵan jumys búgin «AMANAT» partııasy fraktsııasynyń jıynynda qorytyndylandy. Depýtattar «Halyqpen birge!» saılaýaldy baǵdarlamasynyń júzege asyrylý barysyn, sondaı-aq halyq qalaýlylarynyń saılaýshylarmen kezdesý maqsatyndaǵy óńirlerge aldaǵy saparyna daıyndyq máselelerin talqylady.

Májilis Spıkeri, «AMANAT» partııasynyń tóraǵasy Erlan Qoshanov atap ótkendeı, ótken sessııada fraktsııa músheleri 62 zańǵa bastamashylyq etti. VIII shaqyrylymda zań jobalaryna barlyǵy 5300-den astam ózgertýler men túzetýler engizildi. Májilistiń jalpy otyrystarynda 626 depýtattyq saýal joldandy. Budan bólek, bıýdjetti árbir bekitý kezinde depýtattar óńirlerde ınfraqurylymdyq jobalardy júzege asyrý úshin 1,5 trıllıon teńgege deıin túzetýler engizilýine qol jetkizdi. Osylaısha, naqty saılaýaldy ýádeler qarjymen qamtamasyz etilýde.

«AMANAT» partııasy Ádiletti Qazaqstandy qurý jolyndaǵy reformalardy júıeli júzege asyrýda. Osy úshin biz Memleket basshysynyń bastamalaryna zańnamalyq qoldaý kórsetip kelemiz. Onyń barlyǵy ekonomıka ósimin qamtamasyz etýge jáne qazaqstandyqtardyń ál-aýqatyn jaqsartýǵa baǵyttalǵan. Jalpy, Májiliste qabyldanǵan árbir zań «AMANAT» fraktsııasy depýtattarynyń belsendi atsalysýymen ázirlendi deýge bolady», – dedi ol.

Májilis Spıkeri depýtattar zań shyǵarý jumysy barysynda memlekettiń halyq aldyndaǵy áleýmettik mindettemelerin oryndaýyna, onyń ishinde aýyldardy aýyz sýmen qamtamasyz etý, áleýmettik medıtsınalyq saqtandyrý júıesin reformalaý, turǵyn úı qatynasyn jetildirýge basa nazar aýdarǵanyn atap ótti. Buǵan qosa, jańadan Bıýdjet, Sý jáne Salyq kodeksteri qabyldandy.

Erlan Qoshanov azamattardyń naqty máselelerin sheshýge baǵyttalǵan partııalyq jobalardy júzege asyrýǵa erekshe nazar aýdardy. Atap aıtqanda, «Jer amanaty» komıssııasy 12,5 mıllıon gektar jerdi memleket menshigine qaıtardy. Qaryz qamytyn kıgen 500 myńnan astam adamǵa «Qaryzsyz qoǵam» jobasy aıasynda kómek kórsetildi. Memleket basshysynyń tapsyrmasy boıynsha, bul joba jalpyulttyq sıpatqa ıe boldy. 2000-ǵa jýyq ákim «Ákimder mektebi» arnaıy jobasy aıasynda oqýdan ótti. Partııanyń osy jáne ózge de bastamalary qoǵamda keń qoldaý tapty. Partııa Tóraǵasy atap ótkendeı, depýtattar munyń bárin azamattarǵa belsendi túrde túsindirýge tıis.

Óz kezeginde, Májilistegi «AMANAT» partııasy fraktsııasy jetekshisiniń orynbasary Pavel Kazantsev byltyr partııanyń saılaýaldy baǵdarlamasyn júzege asyrý boıynsha jol kartasy pýnktteriniń úshten ekisi oryndalǵanyn atap ótti. Máselen, azamattyq qyzmetshilerdiń jekelegen sanattarynyń jalaqysy 20%-ǵa ósti, medıanalyq tabystan kedeılik shegin anyqtaý úshin jańa esepteý júıesi engizildi, Qaraǵandy oblysynda kenshiler men metallýrgter úshin jeńildikpen beriletin ıpotekanyń arnaıy baǵdarlamasy iske qosyldy, Batys Qazaqstan oblysyndaǵy 70 shalǵaı eldi mekenge ınternet tartyldy jáne t.b.

Májilis Spıkeri fraktsııa depýtattaryna shekara mańyndaǵy aýdandardy, saıajaı kooperatıvterin damytý máseleleri boıynsha zań jobalaryn ázirleý jumysyn jedeldetýdi tapsyrdy. Olar kelesi sessııada Májiliske engiziledi.

Sonymen qatar aýyldyq aýmaqtardy keshendi damytýǵa, aýyldyq jerlerdegi bilim berý, densaýlyq saqtaý salalaryn jańǵyrtýǵa jáne ınklıýzıvti ortany qamtamasyz etýge baǵyttalǵan «Baquatty audan» pılottyq jobasynyń tájirıbesin birqatar aýdanda taratý josparlanýda. Sondaı-aq depýtattar jastar jumyssyzdyǵy máselesin sheshý boıynsha jeke joba ázirleýge nıetti. Bul – ásirese Jumysshy mamandyqtary jyly óte ózekti.

Jıyn sońynda Májilis Spıkeri óńirlerge aldaǵy sapar kezinde depýtattarǵa júkteletin birqatar mindetti aıqyndady. Sapar barysynda depýtattar óndiristik jáne áleýmettik nysandardy aralap, eńbek ujymdarymen kezdesedi. Sondaı-aq azamattardyń jeke máseleleri boıynsha qabyldaýlar ótkizedi. Shalǵaıdaǵy eldi mekenderge erekshe nazar aýdarylady. Halyq qalaýlylary jańadan qabyldanǵan zańdardyń is júzinde qalaı jumys isteıtinin jáne olardyń jergilikti jerde turǵyndar suranysyna qanshalyqty jaýap beretinin zertteıdi. Sondaı-aq depýtattar jańadan qabyldanǵan zańdar týraly aıtyp, azamattar kótergen mańyzdy máselelermen tanysady. Bolashaqta depýtattar sapar barysynda jınalǵan barlyq aqparatty zań shyǵarý jumysy kezinde paıdalanady.

Osyǵan deıin habarlaǵanymyzdaı, Májilis tóraǵasy Erlan Qoshanov VIII saılanǵan QR Parlamentiniń úshinshi sessııasyndaǵy palatanyń jumysyn qorytyndylady.