«AMANAT» partııasy Astanadan jóneltken gýmanıtarlyq kómek Batys Qazaqstan oblysyna jetti
ORAL. KAZINFORM - «AMANAT» partııasy Astana qalalyq fılıalynyń qyzmetkerleri jóneltken gýmanıtarlyq kómek Batys Qazaqstan oblysyna jetti. Bul týraly Májilis depýtaty Abzal Quspan áleýmettik jelidegi jeke paraqshasynda jazdy.
Elordalyqtar jınaǵan gýmanıtarlyq kómektiń ishinde azyq-túlikpen qatar, balalar men eresekterge arnalǵan jyly kıimder, rezeńke etikter, turmystyq zattar jáne t.b. kerek-jaraq dúnıeler bar.
«Astanadan jóneltilgen gýmanıtarlyq kómek Oralǵa jetti. Aınaldyrǵan 15-20 mınýttyń ishinde jastar júk kóligine tıelgen azyq-túlikti túsirip, qoımaǵa kirgizip úlgerdi. Endi Qyrǵyzstan memleketi joldaǵan kómektiń alǵashqy legi keledi», – dedi Abzal Quspan.
Sondaı-aq «AMANAT» partııasy Batys Qazaqstan oblystyq fılıaly atqarýshy hatshysynyń orynbasary Afıza Semgalıeva Astanadan BQO-ǵa 28 tonna gýmanıtarlyq kómek jetkizilgenin aıtyp, partııalastarǵa alǵysyn bildirdi.
«Búgin áriptesterimiz zardap shekken turǵyndarǵa jibergen gýmanıtarlyq júk kóligin kútip aldyq. Barsha qoldaý bildirgen azamattarǵa úlken alǵys aıtamyz», - dedi ol.
