AMANAT músheleri «Ádiletke» óte ala ma
ASTANA. KAZINFORM - «Ádilet» partııasynyń Saıası keńes bıýrosynyń múshesi Raýan Kenjehanuly AMANAT partııasynyń múshelerine «Ádilet» qataryna qosylý múmkindigi usynylatynyn málimdedi.
Onyń aıtýynsha, partııaǵa múshelikke qabyldaý ár azamattyń jeke tańdaýy negizinde júzege asyrylady.
— Biz barlyq múmkindikti paıdalanyp, AMANAT partııasynyń múshelerine «Ádilet» partııasynyń qataryna qosylý týraly usynys jasaımyz. Biraq bul usynysty qabyldaý nemese qabyldamaý — ár adamnyń jeke sheshimi, — dedi Raýan Kenjehanuly.
Sondaı-aq ol qazirgi ýaqytta partııaǵa múshelikke ótý rásimi jeńildetilgenin atap ótti. Azamattar tsıfrlyq platformalar arqyly onlaın ótinish bere alady.
Raýan Kenjehanulynyń sózinshe, partııa qataryna qabyldaý boıynsha ótinishterdi qabyldaý jumystary bastalyp ketken.
Aıta ketelik «Ádilet» partııasy óńirlik jumysty kúsheıtpek.
