«Amanat» munaı kompanııalaryndaǵy vahtalyq aýysym ýaqytyn retteýdi qolǵa almaq

ASTANA. QazAqparat – «Amanat» munaı kompanııalaryndaǵy vahtalyq aýysymnyń ýaqytyn retteý máselesin qolǵa aldy. Bul jaıynda partııa tóraǵasy Erlan Qoshanov partııa atynan saılanǵan máslıhat depýtattarynyń respýblıkalyq forýmynda aıtty, dep habarlaıdy QazAqparat tilshisi.

«Saılaýshylarmen jumysymyzdyń basty ólshemi – adaldyq pen ýádege beriktik. Biz bul qaǵıdadan aýytqymaýymyz kerek. Mysaly, saılaý kezinde Shyǵys Qazaqstan oblysynyń turǵyndary shekaralyq aýdandardy qalpyna keltirý máselesin qozǵady. Biz bul máseleniń óz quzyrymyzǵa kirmeıtinin ashyq aıttyq. Biraq, ol ótinishti Memleket basshysyna jetkizýge ýáde berdik jáne ýádemizdi oryndadyq. Keshe ǵana Prezıdent Qatonqaraǵaı, Marqakól, Maqanshy aýdandarynyń aldaǵy eki jyldyń ishinde ashylatynyn jarııa etti. Batys óńirge barǵanda, vahtalyq aýysymnyń ýaqytyn retteý týraly áńgime boldy. Biz bul máseleni sol jaqtaǵy alpaýyt kompanııalarmen birlesip, muqııat qarastyryp jatyrmyz», - dedi partııa basshysy.

Sondaı-aq ol partııanyń saılaýaldy baǵdarlamasynda aýylǵa baratyn jas medıtsına qyzmetkerlerine 10 mıllıon teńge kóterme aqy tóleý mindetin qoıǵandaryn eske saldy.

«Ol da oryndalý ústinde. Budan bólek, halyqty tolǵandyryp otyrǵan barlyq máselelerdi partııalyq jobalarymyzdyń aıasynda sheshýge kúsh salyp otyrmyz. Ótken jyldan beri «Aýyl amanaty», «Jer amanaty» jobalary júzege asyrylýda. Jaqynda qarjy saýattylyǵyn arttyrýǵa baǵyttalǵan «Qaryzsyz qoǵam» jobasy bastaldy. Ózge de kóptegen partııalyq jobalarymyz bar. Bul jobalardyń barlyǵy da qarapaıym azamattar úshin jasalǵan», - dedi Erlan Qoshanov.