Avtokólikti 5 mınýttan artyq qyzdyrýǵa shekteý joq - Igor Lepeha
ASTANA. KAZINFORM – Májilis depýtattary, «AMANAT» partııasy fraktsııasynyń músheleri avtokólikpen jolaýshylar tasymaldaý salasyndaǵy memlekettik fýnktsııalardyń bir bóligin ózin-ózi retteýge berý týraly túzetýlerdi qarady. Búginde tıisti zań jobasy Májiliste qaralyp jatyr.
Kólik mınıstri Marat Qarabaev osy zań jobasyn tanystyra otyryp, atalǵan qujat jolaýshylar tasymaly salasynda tártip ornatýǵa múmkindik beretinin atap ótti. Naryqqa qatysýshylar ózin-ózi retteý tetikteri arqyly tarıf belgileý, eńbek kúnin saqtaý, tehnıkalyq baıqaýdan ótkizý, jolaýshylar tasymalynyń qaýipsizdigin qamtamasyz etý syndy problemalardy ózderi sheshetin bolady. Usynylǵan novellalar taksı agregatorlarynyń baǵa belgileý isindegi ashyqtyǵyn jaqsartýǵa, sondaı-aq naryq qatysýshylary úshin ádil báseke men teń jaǵdaı jasaýǵa múmkindik beredi.
Talqylaý barysynda birqatar depýtat usynylǵan zań jobasynda ózin-ózi retteıtin uıymdardyń jol qozǵalysy qaýipsizdigin qamtamasyz etýge qajet jetkilikti resýrsy men ókilettigi joq degen alańdaýshylyq bildirdi. Sonymen qatar, negizgi fýnktsııalardy jeke birlestikterdiń shekteýli sanyna berý qadamy naryqty monopolııalaýǵa, baǵa kelisiminiń paıda bolýyna jáne osy sala negizgi tabys kózi bolyp otyrǵan 500 myńnan astam taksı júrgizýshisiniń qarjy júktemesiniń artýyna áser etýi múmkin.
Májilis Spıkeri, «AMANAT» partııasynyń Tóraǵasy Erlan Qoshanov talqylaý barysyn qorytyndylaı kele, búginde jolaýshylar tasymaly salasyn retteýde jańa kózqarasty talap etetin kóp problema qordalanyp qalǵanyn atap ótti. Mınıstrlik usynǵan sharalar túsinikti ári nazar aýdarýǵa laıyq bolǵanymen, bul usynystar memleket tarapynan júrgiziletin kólik baqylaýyn álsiretip almaýy kerek. Ol joldaǵy qaýipsizdikti qamtamasyz etý, sonyń ishinde jolaýshylardyń ómirin saqtandyrý boıynsha naqty mindettemelerdi zańda tikeleı bekitý qajet ekenin jetkizdi.
– Prezıdent halyqqa Joldaýynda jol qaýipsizdigin qamtamasyz etýdi tapsyrdy. Mınıstrlik osyǵan qatysty máselelerdi sheshýge múmkindik beretin dáleldi ári jan-jaqty paıym-kózqarasyn ortaǵa saldy. Solaı bola tura, tasymaldaý salasyndaǵy ózin-ózi retteýge umtylamyz dep taksı júrgizýshileriniń kúndelikti tabysyna teris áser etpeýimiz kerek. Mınıstrlik barlyq jańashyldyqty taksı salasynda jumys isteıtin azamattardyń pikirin eskere otyryp usynýǵa tıis. Barlyq daýly máseleniń ortaq sheshimin tabý kerek. Biz kún saıyn mıllıondaǵan adamǵa tikeleı áser etetin jolaýshylar tasymaly salasyndaǵy áleýmettik shıelenisti joıýymyz kerek, – dedi ol.
Májilis Tóraǵasy zań jobasyna qatysty máselelerdi eskere otyryp, mınıstrlikke ózin-ózi retteý uıymynyń jumysyna pılottyq testileý júrgizýdi jáne sonyń nátıjesi negizinde osy másele boıynsha tyń tásilder ázirleýdi usyndy.
Sonymen qatar, pikirtalas barysynda depýtattar Іshki ister vıtse-mınıstri Igor Lepehaǵa azamattardy adastyratyn rezonanstyq aqparatqa jedel áreket etýdiń mańyzyn atap ótti. Máselen, avtokólikti bes mınýttan artyq qyzdyrǵany úshin aıyppul salynatyny aıtylýda.
– Avtokólikti 5 mınýttan artyq qyzdyrýǵa shekteý joq. Eldi mekenderde turǵyndarǵa qolaısyzdyq týǵyzǵan jaǵdaıda mehanıkalyq kólik quraldarymen otaldyrǵan qalpy toqtap turýǵa tyıym salynady. Tek aryz túsken jaǵdaıda ǵana bul norma boıynsha jaýapqa tartamyz. Byltyr osyndaı úsh jaǵdaı tirkelip, onyń biri prokýratýra tarapynan joıyldy, ıaǵnı biz kólik qyzdyrǵan adamdy jaýapqa tartpaımyz, – dep sendirdi vıtse-mınıstr.
Sondaı-aq fraktsııa otyrysyna Básekelestikti qorǵaý jáne damytý agenttiginiń, QR «Atameken» UKP-nyń basqarma basshylyǵy jáne taǵy basqalar qatysty.
Qazaqstan qalalarynda taksı qyzmeti tarıfiniń qandaı aıyrmashylyǵy bar ekenin jazǵan bolatynbyz.