Aman qalǵan kenshiler «Abaı» shahtasyndaǵy qaıǵyly oqıǵa týraly aıtyp berdi
QARAǴANDY. QazAqparat – «Abaı» shahtasynda oryn alǵan metannyń kenetten taralýy kezinde aman qalǵan eki kenshi sol kúngi apat týraly aıtyp berdi. Olar 6 áriptesiniń ólimine qatysty kóńil aıtyp, dárigerler men qutqarýshylarǵa alǵys bildirdi, dep habarlaıdy QazAqparat tilshisi.
Elaıdyn Zeınalov pen Jeńis Maralbaev 7 qarashada aýrýhanaǵa jetkizildi. Eki naýqas ta shahtalyq gazdan, onyń ishinde metan jáne ýly gazdan jiti ýlanǵan.
Ári qaraı kómek kórsetý úshin jansaqtaý bólimine jatqyzyldy.
8 qarashada reanımatsııadan shyqqan naýqastar odan ári emdeý úshin palataǵa, toksıkologııa bólimine aýystyryldy.
Qaraǵandy oblysy densaýlyq saqtaý basqarmasynyń málimetinshe, olardyń jaǵdaıy turaqty.
Kórsetkish nátıjesine qaraı otyryp, olardy kelesi aptada úıge shyǵarýy múmkin. Kenshiler qaıǵyly kúndi túrshige eske alady.
«Biz jumysqa keldik. Bári jaqsy boldy. Jumysqa daıyndala bastadyq. Apat nelikten bolǵanyn eshkim bilmeıdi. Bir mezgilde daıyndyqpen aınalysatyn jigitter: «Gaz. Shyǵyńdar» dep aıqaı saldy. Biz qaıta burylyp, shyǵa bastadyq. Ári qaraı ne bolǵanyn túsinbeı qaldym. Basqa eshteńe esimde joq. Shań kóterildi. Jel turdy. Qubyrdan soryp shyǵaryp jatqandaı sezindim ózimdi. Meni alyp shyqqany esimde. Apat orynda bir saǵatqa jýyq jattym. Qudaıǵa shúkir, tiri qaldym. Qaza bolǵandar máńgi esimizde qalady. Olardy esime alǵan saıyn júregim syzdaıdy. Bárimiz birge ıyq tirese jumys istedik. Eń az bilemin degen jigittermen bes-alty jyl birge jumys istedik. Al kóbisimen 15-20 jyl qyzmettes boldyq. Barlyǵy da jaqsy jigitter edi. Eshqashan umytpaımyn. Biz qalaı kómekteser edik? Qolymyzdan eshteńe kelmedi. Al olardyń ata-analaryna sabyr tileımin, osy qaıǵyǵa tótep berer jiger tileımin. Biz shamamyz kelgenshe qoldaý kórsetemiz», - deıdi Elaıdyn Zeınalov.
Ol sondaı-aq dárigerlerge jáne barlyq medıtsınalyq qyzmetkerlerge kórsetken kómekteri úshin alǵysyn bildirdi.
Jeńis Maralbaev ta dárigerler men qutqarýshylarǵa alǵysyn bildirdi.
«Barlyq sátter esimde joq. Jarq etti. Kenetten jarylys sezindim. Sodan keıin tútin shyqty. Shamdar shıqyldaı bastady. Esimnen tanyp qaldym. Shahtınsk bólimshesinen kelgen jigitterge rahmet. Jedel shyǵaryp aldy. Meni birinshi shyǵardy. Gazdyń ıisi de, dámi de joq. Birneshe ret dem alasyń, esińnen tanyp qalýǵa sol da jetkilikti. Dárigerlerge rahmet. Barlyq em-sharalaryn jasady. Kútim de jaqsy boldy. Shahtınsk bólimshesinen kelgen jigitterge jeke alǵysymdy aıtamyn. Óte jyldam jumys istedi. Qutqaryp aldy», - deıdi aman qalǵan ekinshi shahter Jeńis Maralbaev.
Eske sala keteıik,7 qarashada «Abaı» shahtasynda jeldetkish shtrek kenjarynda metan taraldy. Apat saldarynan alty shahter qaza tapty, taǵy ekeýi aýrýhanaǵa tústi.
Eske salaıyq, 7 qarashada «ArselorMıttal Temirtaý» AQ kómir departamentiniń «Abaı» shahtasynda metan gazy taraı bastaǵan.
Bul ýaqytta shahtada 64 adam jumys istep jatqan, 54-i evakýatsııalandy.
Apat saldarynan eki adam zardap shegip, alty kenshi qaza tapty. Zardap shekkender aýyr halde jansaqtaý bóliminde jatyr.
Prezıdent Qasym-Jomart Toqaev qaza tapqan shahterlerdiń jaqyndary men týystaryna kóńil aıtty. Sondaı-aq zardap shekken azamattardyń tezirek saýyǵyp ketýine tilektestik bildirdi.
Apat saldarynan qaza bolǵandar men zardap shekkenderdiń esimi jarııalandy.
QR TJM basshysy ıÝrıı Ilın BAQ ókilderine arnalǵan brıfıngide apatqa qatysty qylmystyq is qozǵalǵanyn aıtty.
Kóz jumǵan 6 kenshi metan gazy taraǵan kezde qutqarý quralyn kıip úlgermeı qalǵan.
