Aman, Esen, Júrsin – Jambyl oblysynda dúnıege kelgen úshemge osyndaı esim berilgen
TARAZ. QazAqparat –Jambyl oblysynda jyl basynda T.Rysqulov aýdanyndaǵy Qurmanalıevter otbasynda úshem dúnıege keldi, - dep habarlaıdy QazAqparat.
Aýdan aýmaǵynan shalǵaı jatqan Aqnıet aýyldyq okrýginiń ortalyǵy Dinmuhamed Qonaev aýylynda turatyn Qurmanalıevter otbasy úshin jańa jyl jaǵymdy jańalyqpen bastalǵan. Sebebi, Dıdar men Qymbattyń buǵan deıin Dılıara jáne Darııa esimdi ápkeli-sińlili eki qyzdary bolsa, endi olardyń úsh inisi bar. Birge týǵan shaqalaqtardyń úsheýi de er bala. Úshemniń esimderin 58 jastaǵy Dáýlet atalary qazaqy yrymǵa balap «Aman, Esen, Júrsin» dep qoıypty.
Aýdan ákimi Erbolat Sadyrqulov Dinmuhamed Qonaev aýylyna arnaıy baryp, Qurmanalıevter áýletin quttyqtady. Óz sózinde aýdan basshysy úshemniń densaýlyǵy árqashan mańyzdy ekenin atap ótip, jergilikti bılik tarapynan shaqalaqtarǵa barlyq jaǵdaı jasalatynyn da aıtty. Sondaı-aq, Aman, Esen, Júrsinge balalar arbasy (kolıaska) men jańajyldyq syılyqtar tabys etti.
«Alǵashqyda ÝZI nátıjesi belgili bolǵanda azdap ýaıymdaǵan bolatynbyz. Biraq, qazir qýanyshymyzda shek joq. Ana men bala densaýlyǵy úshin baryn salyp eńbek etip júrgen aq halatty abzal jandarǵa alǵysym sheksiz»,- deıdi ol.
Aıta keteıik, týǵan sátte úshemniń ekeýiniń salmaǵy eki keli úsh júz gramm bolsa, bireýiniki bir keli jeti júz gramm bolǵan eken. Qazirgi kúni Aman, Esen jáne Júrsinniń densaýlyqtary qalypty. Aýdandyq ortalyq aýrýhana men aýyldyq dárigerlik emhana tarapynan qajetti kómekterdiń barlyǵy derlik kórsetilýde eken. Bul jas otbasy Dıdar men Qymbattyń besinshi sábıleri. Úshemniń aldynda olardyń Dılıara jáne Darııa esimdi ápkeli-sińlili eki qyzdary bar.
