Amal — alashqa ortaq mereke
AQTAÝ. KAZINFORM — Mańǵystaýda Amal merekesi bastaldy. Búginnen bastap óńir turǵyndary úı-úıdi aralap, qazaqtyń dástúri boıynsha bir-birin quttyqtap, kórisedi.
Osyǵan oraı jyldaǵy dástúr boıynsha Otpan taýda «Amal — alashqa ortaq mereke» merekelik is-sharasy bastaý alyp, ekinshi kún qatarynan keń kólemde toılanyp jatyr.
Mańǵystaýdaǵy Qara taýdyń eń bıik shoqysynyń eteginde elýge jýyq kıiz úı tigilip, mádenı-sporttyq sharalar uıymdastyrylsa, jergilikti ónerpazdardyń qatysýymen kontsert bastaldy. Keshe jaǵylǵan Birlik otynan keıin qazir munda aǵylǵan jurttyń qarasyn kóp. Solardyń arasynda Aqtóbe oblysynan Amal merekesine arnaı kelgen Saǵyndyq Jetiǵarın da óziniń alǵan áserimen bólisti.
«Elimizdiń kópshilik Naýryz merekesin toılasa, elimizdiń batys óńirlerinde Amal merekesi 14 naýryzdan bastaý alady. Ásirese, bul kúndi Mańǵystaýda erekshe toılaıtyny kópshilikke belgili. Jyl bastaýy sanalatyn bul kún — ulttyq merekege aınalýy kerek. Elimiz aman bolyp, osyndaı qýanyshty kúnderdi atap ótýdiń ózi bir úlken baqyt. Barshańyzdy merekemen quttyqtaımyn, — dedi aqtóbelik Saǵyndyq Jetiǵarın.
Keshe Otpan taýda respýblıkalyq «Amal — alashqa ortaq mereke» is-sharasyna Túrkııa, Ózbekstannan da arnaıy meımandar kelip qatysty. Túrkııa Respýblıkasy «Qyrǵyz, Túrik, Manas» ýnıversıtetiniń oqytýshysy, professor Irfan Górdal amal týraly oıymen bólisti.
«Túrki halyqtarynda Naýryzdyń orny erekshe. Mańǵystaýǵa alǵash ret kelip otyrmyn. Amal merekesine shaqyrǵanyna kóp rahmet. Bizdiń Túrkııada ejelden beri naýryz merekeledi. Sońǵy 15-20 jylda taǵy bir bıik deńgeıge kóterildi. Amalǵa osynshalyqty mán berip, Naýryz aldyndaǵy daıyndyq dep oı túıdim», — dedi Irfan Górdal.
Ózbekstan Respýblıkasynyń Eńbek sińirgen mádenıet salasynyń qyzmetkeri, jyrshy, óner salasynyń magıstry Mahammad Eshboev Amaldyń mańyzyn atady.
«Ata-babamyzdyń túbi bir. Toılarymyz ben ózge de qýanyshty atap ótý dástúrimiz uqsas. Qazaqstanda ánshi-jyrshysyz toı ótpeıdi. Sol oraıda Naýryzdy ózbek pen qazaq qatar toılaıdy. Al Amal merekesiniń birer apta buryn erte bastalyp, toılanýy bizdi erekshe qyzyqtyrady. Qazaq halqynyń ózindik dástúrin, bolmysyn, toı toılaý úrdisin kórip, elge barǵanda aıtyp júremin», — dedi Mahammad Eshboev.
Keshe Otpan taýda merekege oraı keshkilik Birlik oty jaǵylǵan bolatyn. Atalǵan rásimge óńir turǵyndarymen birge oblys ákimi bastap, ózge óńirlerden kelgen birqatar qurmetti qonaqtar arnaıy qatysty.
