Aljırdegi orman órtinen qaza tapqandar sany 65-ke jetti
NUR-SULTAN. QazAqparat – Aljırdegi orman órtiniń saldarynan qaza tapqan adamdardyń sany 65-ke jetti. Bul týraly Al Jazeera málim etti, dep habarlaıdy QazAqparat.
Telearnanyń derekterine qaraǵanda, tabıǵı apattan 37 adam jáne órtti sóndirýmen jáne izdestirý-qutqarý operatsııalaryn júrgizýmen aınalysqan Aljır armııasynyń 28 áskerı qyzmetkeri qaza tapqan. Al seısenbi kúni Afrigatenews jańalyqtar portaly 25 áskerı qyzmetkerdiń qaıtys bolǵany týraly habarlaǵan edi.
Aljırdiń Ulttyq telehabar taratý qyzmetiniń aqparatynsha, orman órtteri eldiń birneshe provıntsııalarynda órship tur. Olar: Djıdjel, Setıf, Bedjaııa, Annaba, Tebessa, Blıda, Býıra, Býmerdes, Gelma jáne Henshela. Óńirlik bıliktiń boljamynsha, órt ystyq aýa temperatýrasynyń saldarynan tutanǵan, alaıda keıbirinde qoldan ot qoıǵan bolýy múmkin. Tilsiz jaýdy aýyzdyqtaýǵa Aljır áskerıleri kómek kórsetýde.
