Aljırdegi alapat orman órtinen 6 adam kóz jumdy
ASTANA.KAZINFORM — Aljırdiń soltústik jáne soltústik-shyǵys óńirlerin sharpyǵan aýqymdy orman órtinen 6 adam qaza taýyp, taǵy 100-ge jýyq turǵyn zardap shekti. Bul týraly eldiń Іshki ister mınıstrligi málimdedi, dep habarlaıdy Report.
Vedomstvonyń deregine sáıkes, sońǵy bir táýlikte zardap shekken aýdandardan 100-den astam turǵyn aýrýhanaǵa jetkizilgen. Olardyń barlyǵynyń jaǵdaıy turaqty.
Azamattyq qorǵanys qyzmetiniń málimetinshe, sońǵy ýaqytta Aljırdiń soltústiginde 1,5 myńnan astam órt oshaǵy tirkelgen. Tilsiz jaý orman alqaptaryn, palma toǵaılaryn jáne aýyl sharýashylyǵy jerlerin sharpyǵan. Sondaı-aq 150-den astam turǵyn úı zaqymdanǵan. Mundaǵy turǵyndary der kezinde evakýatsııalandy.
Qazir órtti sóndirý jumystaryna ekpindi jel men aýa temperatýrasynyń +35°C-tan joǵary bolýy qıyndyq týǵyzyp otyr.
Aıta keteıik, Ispanııadaǵy orman órti 50 myń gektardan astam aýmaqty sharpydy.
Al Germanııadaǵy ormannyń 390 gektary qyzyl jalynǵa orandy.
