Aljırde orman órtinen 12 adam qaza taýyp, úsh kúndik aza tutý jarııalandy
ASTANA. KAZINFORM – Aljırdiń soltústik-shyǵysynda bolǵan joıqyn orman órtinen keminde 12 adam qaza taýyp, ondaǵan adam jaraqat aldy, dep habarlaıdy Euronews.
Órt el astanasy Aljırden shyǵysqa qaraı 350 shaqyrym jerde ornalasqan Djıdjel provıntsııasyndaǵy aýyldarǵa aıtarlyqtaı zalal keltirdi. Qazir turǵyndar shyǵyn kólemin eseptep, tıisti qyzmetter elektr jelilerin qalpyna keltirip, zardap shekken aýmaqtardy tazalap jatyr.
26 tamyzda Djıdjel provıntsııasynyń Agbala aýylynda túsirilgen vıdeodan órt sóndirýshiler tilsiz jaýdy aýyzdyqtaýǵa tyrysyp jatqanda, turǵyn úıdi jalyn qorshaǵanyn kórýge bolady. Al Aljırdiń azamattyq qorǵanys qyzmeti 27 tamyzda jarııalaǵan kadrlarda órt sóndirýshilerdiń provıntsııa aýmaǵyndaǵy orman órtimen kúresip jatqany, jalynnyń taý bókterin sharpyǵany kórinedi.
Órtten qatty zardap shekken Djıdjel provıntsııasyndaǵy Bordj-Taher aýdanynda turǵyndar ottan búlingen úıleri men aýyl sharýashylyǵy alqaptaryna oraldy. Mamandar elektrmen jabdyqtaý júıesin qalpyna keltirýge kiristi. Bıliktiń málimetinshe, 400-ge jýyq mal qyrylǵan. Asherar, Anchıd, El-Ýadıa jáne Tagrast aýyldary da órtten zardap shekti.
Іshki ister mınıstri Saıd Saıýdtyń málimetinshe, Djıdjel provıntsııasynda bes, Bedjaıada tórt, Tızı-Ýzýda úsh adam qaza tapqan. Kúıik shalǵan taǵy 54 adam aýrýhanaǵa jetkizilip, olardyń altaýy aýyr jaǵdaıda jatyr.
Aljırdiń azamattyq qorǵanys qyzmetiniń dereginshe, beısenbi kúni el aýmaǵynda sońǵy 24 saǵatta tirkelgen 193 órt oshaǵynyń 46-synda jalyn áli sóndirilmegen.
27 tamyzda premer-mınıstr Sıfı Grıeb Djıdjelge baryp, órtten kelgen shyǵyn kólemimen tanysyp, tótenshe jaǵdaı saldaryn joıý sharalaryn úılestirdi.
Prezıdent Abdelmadjıd Tebbýn elde úsh kúndik ulttyq aza tutý jarııalady. Osy kezeńde memlekettik týlar tómen túsirilip, mádenı jáne sporttyq is-sharalar ótkizilmeıdi.
Eske sala ketsek, buǵan deıin de Aljırdegi orman órtinen 6 adam kóz jumǵan edi.
