Aljırde el ushaǵynyń apatqa ushyraýyna baılanysty qaraly kún jarııalandy
ASTANA. QazAqparat - Aljırde «Air Algerie» avıkompanııasynyń ushaǵynyń apatqa ushyraýyna baılanysty úsh kúndik qaraly kún jarııalandy, dep habarlady ITAR-TASS.
«Aljır prezıdenti Ábdel Ázız Býteflıka «Air Algerie» áýe kompanııasynyń ushaǵynyń qulaýyna baılanysty elde úsh kúndik qaraly kún jarııalady, apat saldarynan ártúrli derekter boıynsha 116-dan 119-ǵa deıin adam qaza tapqan», - delingen habarlamada.
Aljırdiń SІM basshysy Ramtan Lamamranyń aıtýynsha, «qulaǵan ushaqtyń tehnıkalyq aqaýlary bolmaǵan». Ol aljırlik bılik qaıǵyly oqıǵanyń mán-jaıyn tergeý máselesi boıynsha Malı ókilderimen turaqty baılanysta ekendigin málimdedi. R.Lamamra sondaı-aq Malı soltústiginde áreket etýshi qarýly top kómek kórsetip jatqanyn, atap aıtqanda, olar ushaqtyń qulaǵan orny týraly ýaqtyly aqparat bergenin atap ótti. Esterińizge sala keteıik, 24 shildede Býrkına-Faso astanasy Ýagadýgýden Aljırge baǵyt alǵan McDonnell 83 ushaǵymen baılanys joǵalyp ketken. AH5017 reısin ushaqty ıspandyq Swiftair-den jalǵa alǵan Air Algerie kompanııasy júzege asyrǵan. Laınermen baılanys ol Ýagdýgýden ushyp ketkennen keıin 50 mınýttan soń úzilgen. Ushaq bortynda 116 adam, olardyń ishinde 15 eldiń azamaty bolǵan, kópshiligi - frantsýzdar. Barlyǵy qaza tapty dep boljanýda.
