«ALJIR» zardabyn baıandaıtyn «Taǵdyrlardy biriktirgen Qazaqstan» atty kitap jaryq kórdi
ASTANA. Mamyrdyń 31-i. QazAqparat /Qanat Mámetqazyuly/ ‑Qazaqstan halqy Assambleıasynyń, Saıası qýǵyn‑súrgin jáne totalıtarızm qurbandarynyń «ALJIR» memorıaldy kesheniniń bastamasymen,
sondaı‑aq TMD Memleketaralyq gýmanıtarlyq yntymaqtastyq qorynyń qoldaýymen «Taǵdyrlardy biriktirgen Qazaqstan» atty kitap jaryq kórdi. Bul týyndynyń tanystyrylymy jaqynda «Tarıhtan taǵylym‑ótkenge taǵzym» atty halyqaralyq joba aıasyndaǵy forým barysynda ótti, dep habarlaıdy QazAqparat.
Kitapta HH ǵasyrdaǵy túrli qýǵyn‑súrginde azap keshken san ulttyń ardaqty azamattary men aıaýly arýlarynyń taǵdyry, ómir joldary, qýǵyn‑súrginniń tarıhı sıpattamasy, sondaı‑aq ǵylymı zertteýler men qıyndyq keshken jandardyń ózderi qaldyrǵan estelikteri qamtylǵan. Azapty jyldardyń eskertkishindeı bolǵan «ALJIR» (Otanyn satqandar áıelderiniń Aqmola lageri) tar qapasy men ony meken etken qyryqtan astam ult ókilderiniń qaıǵy‑muńy jáne analyq arman‑tilekteri shynaıy sýretteledi.
Shyǵarmanyń ańdatpasynda : «HH ǵasyr - qazaq tarıhynda ǵana emes, búkil Keńes Odaǵy atanǵan respýblıkalar tarıhynda óziniń zaýaly men zulmaty, azaby men qaıǵysyn qatar júrgizgen stalındik qatygez saıasatpen este qaldy. 20-shy jyldardyń basynda bastalǵan «qyzyl qyrǵyn» kezeńi 30‑40-shy jyldarǵa, budan keıin 50-shi jyldardyń sońyna deıin jalǵasty. Resmı derekterde saıası qýǵyn‑súrgin kórgenderdiń bas‑aıaǵy 60 mıllıonǵa jetkeni aıtylsa, tek atý jazasyna kesilgeni 24 mln. adamdy quraıdy eken. Qazaqstan sol bir azapty jyldary júzden asa ult adamdary úshin qonys alańyna, úlken qýǵyndaý lagerine de aınaldy», delingen.
Murajaı qyzmetkerleri qurastyrǵan tolyqqandy kitap sol zulmat jyldarynan bergi Qazaq eli tarıhynda stalındik totalıtarlyq júıe zardaptaryn tartqan taǵdyrlardyń tarıhyn baıandaıdy. Sonymen birge, jınaqqa tek qana elimizdegi saıası qýǵyn‑súrgin qurbandary ǵana emes, sheteldik azamattar, ózge ult ókilderiniń bastan keshken azapty oqıǵalary da arqaý bolǵan.
Shyǵarma QR Prezıdenti N. Nazarbaevtyń «ALJIR» memorıaldy‑murajaı kesheniniń ashylýy barysynda sóılegen sózimen bastalady. Onda Elbasy: «Kommýnıstik ıdeologııaǵa súıenip, Stalın bastaǵan totalıtarlyq júıeniń josyqsyz áreketi áli kúnge deıin boıymyzdy ashý-yzaǵa toltyrady. Biz sol jastaı solǵan jasampaz tulǵalardyń aldynda ǵumyr boıy bas ıip ótýge mindettimiz», degen bolatyn.
