«ALJIR» tutqyndaryna qatysty qundy qujattar restavratsııalandy

ASTANA. QazAqparat - 2017 jyly elordalyq mýzeılerdiń 44 jádigeri qaıta qalpyna keltirildi. Olardyń otyzdan astamy Saıası qýǵyn-súrgin jáne totalıtarızm qurbandarynyń ALJIR memorıaldy-murajaı keshenine tıesili, dep habarlaıdy QazAqparat ákimdiktiń saıtyna silteme jasap.

«ALJIR» tutqyndarynyń balalaryna, balalardyń analaryna jazǵan hattary, tutqyn áıelderdiń 30-shy jyldardaǵy fotosýretteri, aqtaý týraly anyqtamalary, mýzykalyq aspap, saptyaıaq. Saıası qýǵyn-súrgin jáne totalıtarızm qurbandarynyń ALJIR memorıaldy-murajaı keshenindegi tarıhı mańyzy bar osyndaı 32 jádiger «Rýhanı jańǵyrý» baǵdarlamasynyń sheńberinde restavratsııadan ótti. Olardyń arasynda «ALJIR» tutqyndary: Roza Tsypkınanyń, Marııa Mınkınanyń, Ǵaınıjamal Ǵaısınanyń, Gertrýda Plataıstyń, Rahıl Týrkınanyń, Tatıana Shahovanyń, Irına Shýbrıkovalardyń qujattary men jeke zattary bar. Murajaı kesheniniń bas qor saqtaýshysy Janar Ergeldınanyń aıtýyna qaraǵanda, qujattardyń basym bóligi mýzeıge 2015 jyly kelip túsken.

«2014 jyldan bastap bizdiń murajaıdyń 100-ge jýyq jádigeri qalpyna keltirildi. «Rýhanı jańǵyrý» baǵdarlamasynyń aıasynda qalpyna keltirilgen qujattar men fotosýretterdiń túpnusqasy murajaıǵa 2015 jyly kelip túsken bolatyn. Materıaldardyń barlyǵy murajaıdyń ekspozıtsııalaryna qoıyldy. Mysaly, tutqyn - Roza Tsypkınanyń jalǵyz ózine qatysty 10 qujat restavratsııadan ótken. Olardyń ishinde ol kisiniń lagerden óz balasy Benge jazǵan hattary, fotosýretteri, balalaryna qatysty anyqtamalary bar. Bul qundy qaǵazdar bizge 2015 jyly Roza Tsypkınanyń Kalıfornııada turǵan uly Benniń ózi tapsyrdy», - dedi Janar Ergeldına.

Restavratsııalyq jumystardy «Integratsııa sıstem» JShS júrgizdi. Jádigerlerdi qalpyna keltirý barysynda konservatsııa, shańnan, kirden tazartý, túzeý, qujattardyń jyrtylǵan bólikterin qalpyna keltirý, jelimdeý sııaqty jumystar júrgizildi.

«ALJIR» saıası qýǵyn-súrgin jáne totalıtarızm qurbandary murajaı-memorıaldyq kesheni 2007 jyly Aqmola oblysyna qarasty Tselınograd aýdanynyń ortalyǵy Aqmol aýylynda Elbasy Nursultan Nazarbaevtyń tikeleı atsalysýymen ashylǵan bolatyn. Búgingi tańda mýzeı qory 15 myńnan astam jádigerden turady.

Ekspozıtsııalardy seısenbi men jeksenbi kúnderiniń aralyǵynda tańǵy saǵat 10:00-den keshki saǵat 18:00-ge deıin kórýge bolady.