ALJIR mýzeıinde lıft qulap, eki áıel jaraqat aldy

AQMOL. QazAqparat – «Aljır» mýzeıinde lıft qulap, eki áıel jaraqat aldy. Ekeýi de aýrýhanada jatyr, dep habarlaıdy QazAqparat Aqmola oblystyq polıtsııa departamentiniń baspasóz qyzmetine silteme jasap.

«16 shildede Tselınograd aýdandyq polıtsııa bóliminiń kezekshi bólimine Astana qalalyq Polıtsııa departamenti Jedel basqarý ortalyǵynan Astanadaǵy Travmatologııa jáne ortopedııa ulttyq ǵylymı-zertteý ortalyǵyna túrli jaraqat alǵan eki áıel túskenin habarlady. 1940 jylǵy elorda turǵyny men 1969 jylǵy Aqmol aýyly turǵynynyń túrli dene múshesi synǵan. Aldyn ala belgili bolǵandaı, olar ALJIR mýzeıinde júrip, lıft qulaǵan kezde jaraqat alǵan», - delingen polıtsııa habarlamasynda.

Tselınograd aýdany Aqmol aýyly «ALJIR» mýzeıinde lıfttiń qulaý faktisi boıynsha QR QK 306-baby 2-bólimi 2-tarmaǵy «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» boıynsha sotqa deıingi tergeý jumystary bastaldy.