«ALJIR» murajaıynda tutqyn áıelder taǵdyrynan syr shertetin jańa zal ashyldy
ASTANA. 29 shilde. QazAqparat - «ALJIR» memorıaldy-murajaı kesheninde «Biz kýálik etemiz...» atty kishi zal ashyldy. Bul týraly astana.kz saıtynan habarlandy.
Ekspozıtsııada «ALJIR» lagerindegi tutqyn áıelderdiń jeke zattary, fotosýretteri, muraǵattyq qujattar usynylǵan. Lager tozaǵyn tartqan qaıǵy-qasiretine qaramastan óz jaqyndary men týystaryna adal bolǵan áıelder, belgili aqyn-jazýshylardyń, memlekettik jáne saıası qaıratkerlerdiń jubaılary - Gúljamal Maılına, Ázıza Rysqulova, Dámesh Júrgeneva, Zufnun Nurmaqova, Odaqtyń tanymal ánshisi Lıdııa Rýslanova, dybyssyz kınonyń aktrısalary - Rahılıa Plısetskaıa, Lıdııa Frenkel jáne t.b. taǵdyrynan syr shertedi.
Kórmege 16 tutqyn áıeldiń jeke zattary men fotosýretteri qoıylǵan. Kishi zaldyń ashylýy Astana qalasynyń Іshki saıasat basqarmasynyń qoldaýymen júzege asty.
«Saıası qýǵyn-súrgin jáne totalıtarızm qurbandaryna arnalǵan memorıaldy-murajaı keshenine murajaı «Aza tutý arkasy», lagerdegi 7620 tutqyn áıeldiń esimi jazylǵan «Eske alý qabyrǵasy» memorıaly, músindik kompozıtsııalardan turady. Murajaı muraǵattyq qujattar, fotosýretter, jaýap alý hattamalary, atý týraly buıryqtar, qýǵyn-súrginge ushyraǵandardyń jeke isterinde jazylǵan saıası repressııa qurbandary týraly materıaldardyń negizinde qurylǵan» delingen baspasóz baıanynda.
