«ALJIR» murajaıy qundy ekspozıtsııalarmen tolyqty
ASTANA. QazAqparat - «ALJIR» memorıaldy-murajaı kesheni kórme zaldarynyń jańartylǵan ekspozıtsııalarymen óz jumysyn qaıta bastady. Bul týraly QazAqparat Astana qalasynyń Mádenıet jáne sport basqarmasynyń baspasóz qyzmetine silteme jasap habarlaıdy.
Murajaı qory qýǵyn-súrginge ushyraǵandardyń urpaqtary bergen, sondaı-aq zertteý is-saparlary barysynda Qazaqstan qalalary boıynsha jáne TMD elderinen jınalǵan, buryn qoıylmaǵan biregeı jádigerlerimen tolyqtyryldy.
Jańa materıaldardyń ishinde Shevchenko Valentınanyń anasy «ALJIR» tutqyny Marıam Antsıstiń aıtqan sózinen jasalǵan 1938-1946 jyldary lageriniń jospary, «ALJIR» tutqyndary Madına Aısarınanyń, Rázııa Mendeshevanyń, Aısha Qabylovanyń, Hadıcha Hakımovanyń, Nına Tórequlovanyń, Kıra Bersenevanyń, Roza Tsypkınanyń, Sıma Vaınshteınnyń, Enta Lıhtenshteınnyń, Sofııa Zılberbergtiń, Sofııa Nesmeıanovanyń, Evgenııa Openkonyń (Tsoı), Irena Stolıarskaıanyń jáne t.b. fotosýretteri usynylady.
«ALJIR» lageri tutqyndarynyń jeke zattarynyń ishinde Ǵalııa Gaısınaǵa tıesili «Zınger» tigin mashınasy, Madına Aısarınanyń júnnen toqylǵan kúrtesi, 1946 jyly Marıam Antsıstiń albomǵa japsyrylǵan «ALJIR» lagerinde jasalǵan keste úlgileri, HH ǵasyrdyń 30-40-shy jj. maı shaıqaǵysh jáne t. b. erekshe qundy zattar bar.
«Bul murajaı erekeshe, osynda adam janyna batatyn qujattardy, sýretterdi kórýge bolady. Jańa ekspozıtsııada Qazaqstannyń oblys ortalyqtarynyń muraǵattarynan jáne TMD elderiniń muraǵattarynan jınap ákelingen zattar kórsetilgen. Ekspozıtsııanyń maqsaty - sol ótken kezenniń qıyndyǵyn qazirgi jastarǵa jetkizý jáne osyndaı ótken qıyn kezen qaıtalanbasyn», - dedi Astana qalasy Mádenıet jáne sport basqarmasy basshysynyń orynbasary Narıma Muhambetalına.
Aıta ketsek, murajaıǵa kelýshiler óz betinshe «ALJIR» lageriniń tutqyndary men olardyń otbasylary týraly aqparatpen «ALJIR» zalynda ornatylǵan ınternetke qosylǵan sensorlyq basqarý paneli bar 3 mýltımedııalyq ekran kómegimen tanysa alady. Sonymen qatar, «ALJIR» zalydybystyq súıemeldeýmen jabdyqtalǵan. Atap aıtqanda, tigin tsehynda tigin mashınasynyń jumys dybysy, barak pen túrme kamerasynda áıel men balanyń jylaǵan daýystaryn qosý jáne óshirý avtomatty datchıgi bar.
