«ALJIR» memorıaldymurajaı kesheninde «Azattyqtyń azapty joly» atty kórmeniń jáne úsh tildegi «ALASH - ALZHIR» kitabynyń tusaýkeseri ótedi
ASTANA. 20 qańtar. QazAqparat - 25 qańtar kúni Saıası qýǵyn-súrgin jáne totalıtarızm qurbandarynyń «ALJIR» memorıaldy murajaı kesheninde Qazaqstan Respýblıkasy Táýelsizdiginiń 20 jyldyǵyna oraı «Azattyqtyń azapty joly» atty kórmeniń jáne «37 jyl. Erte solǵan gúlder» beınebaıanynyń, qazaq, orys, aǵylshyn tilderindegi «ALASH - ALZHIR» eki tomdyq kitabynyń tusaýkeserleri ótedi.
Sondaı-aq shara barysynda «ALJIR» murajaıynyń derbes saıty tanystyrylmaq.
Murajaıdyń is-sharalary Táýelsizdiktiń mereıli merekesine tartý retinde ázirlengen «Azattyqtyń azapty joly» atty kórmeni ashýmen bastalady. Endi murajaıǵa kelgen jurtshylyq «Asharshylyq azasy», «Atom tozaǵy», «Til men dástúr mazaǵy» jáne «Qýǵyn-súrgin qasireti», «Aýǵan qaıǵysy», «Aral apaty» bólimderiniń materıaldarymen tanysý barysynda qaısar halqymyzdyń azattyqqa deıingi azapty jolynyń kýási bolady.
Osynaý taqyryptardyń altyn arqaýy - Táýelsizdik desek, basqa túsken azaptan eldi qutqarǵan egemendik taqyryby «Ata-baba armany» bóliminde kórinis tapqan.
Kelýshiler nazaryna, sondaı-aq «37 jyl. Erte solǵan gúlder» ánine túsirilgen beınebaıan men murajaı qyzmetkerleriniń kúshimen ázirlengen «ALASH - ALZHIR» eki tomdyq kitap usynylady.
Kúrdeli jóndeý jumystarynan keıin esigin kelýshilerge aıqara ashqan murajaıdyń jańa jádigerleri, atap aıtqanda, túrmede otyrǵan sýretshi áıelder salǵan jumystar da kópshiliktiń qyzyǵýshylyǵyn týǵyzady.
Tusaýkeser sharaǵa Astana qalalyq mádenıet basqarmasynyń bastyǵy Bolat Majaǵulov, belgili alashtanýshy, jazýshy Tursyn Jurtbaı, qoǵam qaıratkeri, belgili qalamger Jarasbaı Súleımenov, fılologııa ǵylymdarynyń doktory Amantaı Shárip jáne «37 jyl. Erte solǵan gúlder» ániniń avtory Ersaıyn Narymbaev, osy ánniń sózin jazǵan aqyn, marqum Nurqan Jarasqannyń jary Qazına Nurqanova jáne asharshylyq pen qýǵyn-cúrginder taqyrybyn zerttep júrgen basqa da ǵalymdar men qalamgerler qatysyp, jýrnalısterdiń suraqtaryna jaýap berdi.
