«ALJIR» lageriniń tutqyny barsha qazaq jurtyna alǵys aıtty

ASTANA. QazAqparat - Saıası qýǵyn-súrgin qurbany, 1930-shy jyldary «ALJIR» lageriniń tutqyny bolǵan áıgili xoreograf, bıshi Maıa Plısetskaıanyń baýyry Azarıı Plısetskıı barsha qazaq jurtyna jáne Elbasy Nursultan Nazarbaevqa alǵys aıtty, dep xabarlaıdy QazAqparat.

20-ǵasyrdyń eń úzdik bıshisi ári xoreograftarynyń biri Azarıı Plısetskıı Astanada Elbasy Nursultan Nazarbaevtyń qatysýymen ótip jatqan Qazaqstan xalqy Assambleıasy etnomádenı birlestikteriniń «Beıbitshilik pen kelisimniń 25 jyly» festıvaline Shveıtsarııadan arnaıy keldi.

«Qurmetti Nursultan Ábishuly! Men januıama aýyr synaq tóngen kezde, óte qıyn, tragedııalyq ýaqytta dúnıege keldim. Meniń anam qaıǵyly «ALJIR» lagerine aıaq basqan kezde men nebári 8 aılyq sharana edim. Tiri qalýymyzǵa múmkindik az edi. Alaıda bizdiń janymyzdan qıyn-qystaý shaqta qolyn sozǵan kóńili keń qazaqstandyqtar tabyldy. Osy jerde men alǵash táı-táı bastym, osy jerde aıaqqa turdym, ózimniń aǵamdy Aleksandr Plısetskıı men Maıa Plısetskaıany kezdestirdim. Men Jer sharyn aınalyp óttim, barlyq elderde boldym, biraq qazaq jerin, bizdi qutqaryp qalǵan jany jaısań qazaq jurtyn erekshe iltıpatpen eske alamyn. Ótkendi saqtap kele jatqan Sizge de, meniń Prezıdentim, úlken alǵys aıtamyn. Qýǵyn-súrginnen japa shekken jandardy eske alý kúnin belgiledińiz. Ótkenimizdi umytpaýǵa múmkindik beretin keremet memorıal keshendi saldyńyz. Sondyqtan men taǵy da bir ret barsha xalyqqa jáne Sizge úlken raxmet aıtamyn! Bas ıemin!», - dedi A. Plısetskıı.