Aljır Islam azyq-túlik qaýipsizdigi uıymyna múshe bolǵysy keledi
ASTANA. QazAqparat - Qazaqstan Prezıdentiniń Arnaıy ýákili - syrtqy ister mınıstriniń orynbasary Aqylbek Kamaldınov jumys saparymen Aljırge bardy.
Sapar barysynda Arnaıy ýákil Aljır Premer-mınıstri Ábdelmalik Sellalmen kezdesken bolatyn, dep habarlaıdy QazAqparat.
Kezdesý barysynda taraptar elder arasyndaǵy saıası, ekonomıkalyq, ınvestıtsııalyq jáne mádenı salalardaǵy ekijaqty yntymaqtastyqqa baılanysty máseleler jıyntyǵyn, sondaı-aq halyqaralyq uıymdar sheńberinde ózara is-qımyldyń keleshegin talqylady.
Sonymen qatar, Arnaıy ýákil Qazaqstan men Aljırdiń Islam yntymaqtastyǵy uıymyndaǵy áriptestik deńgeıiniń óte joǵary ekendigin atap ótti. Ol Aljırdiń Soltústik Afrıka aımaǵyndaǵy turaqtylyqty saqtaýda basty ról atqaryp otyrǵan ıslam álemindegi eń iri memleketterdiń biri ekenine nazar aýdara otyryp, 2017 jylǵy 10-11 qyrkúıekte Astana qalasynda ótetin IYU-nyń ǵylym jáne tehnologııalar boıynsha birinshi Sammıtine qatysýynyń mańyzdylyǵy týraly Qazaqstan Prezıdentiniń joldaýyn tapsyrdy.
Óz kezeginde A. Sellal Astana sammıtine jeke óziniń qatysatynyn qýattap, Qazaqstan Prezıdenti N. Nazarbaevtyń Islam azyq-túlik qaýipsizdigi uıymyna (IAQU) qatysty bastamasyna qoldaý jasaıtynyn aıtty. Aljır Premer-mınıstri jýyq arada Uıymnyń jarǵysyna qol qoıýǵa jáne onyń tolyq quqyqty múshesi bolýǵa daıyndyǵyn rastady.
«Budan bólek, Arnaıy ýákil Astanada ótetin «EKSPO-2017» kórmesiniń jumysyna Aljır tarapynyń qatysatyndyǵy úshin alǵys aıtyp, ol is-sharanyń Aljır úshin óz jetistikteri men balama energetıka salasyndaǵy jańalyqtaryn kórsetetin platformaǵa aınalatyndyǵyna senim bildirdi. Sondaı-aq sapar barysynda A. Kamaldınov Aljır Syrtqy ister mınıstrliginiń Bas hatshysy Hassan Rabehımen jáne mınıstrliktiń basty departamentteriniń dırektorlarymen ártúrli salalardaǵy ekijaqty yntymaqtastyqty belsendirý máseleleri boıynsha kelissózder júrgizdi. Jaqyn arada Qazaqstan-Aljır úkimetaralyq komıssııasyn qurý týraly, ekijaqty negizgi qujattarǵa qol qoıýǵa jáne delegatsııa almasý týraly kelisimge qol jetkizildi», - delingen baspasóz baıanynda.
