Alysty boljaı biletin jolbasshymyzǵa senemiz - Q.Ońǵarov
QYZYLORDA. 14 aqpan. QazAqparat /Jańagúl Serdaly/ - Qyzylorda oblysy Shıeli aýdandyq bilim bóliminiń bastyǵy Qalıolla Ońǵarov bizben áńgimesinde Elbasynyń bıylǵy Joldaýynan da alysty boljaı biletin kóregen de dana jolbasshynyń qoltańbasy aıqyn baıqalatynyn aıtty.
«Egemendi el bolyp, eńse kóterip, joǵalýǵa aınalǵan dinimizdiń, tilimizdiń, ádet-ǵurpymyzdyń keńge qulash urǵanyna, mine, 20 jyldyń júzi boldy, - dedi ol óziniń sózinde. - Qazaq ultynyń qatarǵa enip, álemge tanyla bastaýynyń basty sebepkeri Elbasymyzdyń syndarly saıasaty men halyq keleshegine, ıaǵnı búgini men erteńine salyp jatqan sara jolynyń durystyǵy, ádildigi men ómirsheńdiginde bolyp otyr».
Budan ári suhbatshymyz Elbasynyń alysty boljaıtyn kóregendigi artynan ergen halqyn, erim dep sengen elin adastyrmaǵanyn tilge tıek etti. 20 jyldyń ishinde aıtsa adam nanǵysyz belester baǵyndyryldy. Saryarqanyń tórinde ásem Astana boı kóterdi.Tarydaı shashylyp ketken qanshama qandastarymyz atamekenine oraldy. Elbasymyz Qazaqstan azamattarynyń ómirin tikeleı jaqsartýdy kózdeıtin Joldaýyn jyl saıyn halqyna arnap otyrdy. 1997 jylǵy halyqqa alǵashqy Joldaýynda ol: «2030 jyly bizdiń urpaqtarymyz budan bylaı álemdik oqıǵalardyń qaltarysynda qalyp qoımaıtyn elde ómir súretin bolady», - degen edi. Osy sózderdiń qazirgi tańda shyndyqqa aınalǵanyna árbir qazaqstandyq kýá. Kúni keshe Astanada 56 eldiń basshylary men halyqaralyq uıym ókilderiniń basyn qosqan Sammıt - sonyń aıqyn aıǵaǵy. Dúnıeni dúrbeleńge salǵan daǵdarystan da qınalmaı shyǵyp, damýdyń dańǵyl jolyna tústik.
«Elbasymyz bilim-ǵylymsyz damýdyń múmkin emestigin aıta kele, osy salalarǵa basa nazar aýdaryp, barlyq múmkinshilikterdi eldiń osy mańyzdy salasynyń damýyna arnaýda, - dedi bilim bóliminiń bastyǵy. - Sondyqtan da bolar, qazirgi tańda bilim berý isin damytýda elimiz 129 eldiń arasynda kóshbastaýshylar qatarynda keledi. Ótken onjyldyqta bilimge bólingen qarajat 10 esege kóbeıgen jáne osy jyldarda 750 jańa mektep salynǵan. Elbasymyz bıylǵy «Bolashaqtyń irgetasyn birge qalaımyz» atty Joldaýynda «bilim berýdi jańǵyrtýdy odan ári jalǵastyrýǵa tıispiz» deı kele, «Mektepke deıingi bilim berýmen jáne tárbıemen qamtylǵan balalardyń úlesi 2015 jylǵa qaraı 74 paıyzdy, 2020 jylǵa qaraı 100 paıyzdy quraıtyn bolady. 2020 jylǵa qaraı biz oqytýdyń 12 jyldyq modeline tolyqtaı kóshetin bolamyz. Ol úshin biz 2015 jylǵa qaraı respýblıkalyq bıýdjet qarjysy esebinen keminde eki júz mektep salyp, osynsha mektepti jergilikti bıýdjet esebinen turǵyzamyz. 2015 jylǵa qaraı bilim berý uıymdarynyń 50 paıyzy elektrondy oqytýdy paıdalanyp, 2020 jylǵa qaraı onyń sany 90 paıyzǵa artady», - dep atap kórsetti. Elbasynyń halyq úshin jasap jatqan árbir is-áreketin, aıtqan árbir sózin qýattap, qoldaı otyryp, aýdandaǵy bilim salasynyń qyzmetkerleriniń árdaıym sol kisimen birge bolatynyn jetkizgim keledi».
