Alypsatarlardan tárkilengen maska medıtsına qyzmetkerlerine taratyldy
ALMATY. QazAqparat - Almatyda qalalyq qyzmetterdiń profılaktıkalyq jumysyna 3 mln betperde bólindi, dep habarlaıdy QazAqparat tilshisi.
Qalalyq ákimdik taratqan aqparatqa sáıkes, qazir Almatyda medıtsınalyq betperdeler men antıseptıkalyq quraldardyń alaıaqtyq jolmen saýdaǵa túsýin, sondaı-aq satý kezinde baǵany negizsiz kóterý faktilerin anyqtaý úshin reıd júrgizilýde. Nátıjesinde Almatyda kásipkerlik qyzmetti júzege asyrý úshin tıisti qujaty joq azamattar medıtsınalyq maskany ústeme baǵamen satqan kezde qolǵa tústi.
Qazaqstan Respýblıkasy Prezıdentiniń janyndaǵy Tótenshe jaǵdaı rejımin qamtamasyz etý jónindegi memlekettik komıssııanyń hattamasy negizinde tárkilengen medıtsınalyq betperdelerdiń barlyǵy dereý qalalyq qoǵamdyq densaýlyq basqarmasyna berildi.
Tárkilengen 3 mln betperde sanıtarlyq-epıdemıologııalyq sharalardy kúsheıtilgen rejımde júzege asyryp jatqan qaladaǵy barlyq medıtsınalyq uıymdarǵa bólinip beriledi.
2 mln-nan astam medıtsınalyq betperde qalalyq Qoǵamdyq densaýlyq basqarmasynyń medıtsınalyq qyzmetkerlerine berildi. Búginde olar provızorlyq statsıonarlar men ızolıatorlarda, sondaı-aq úı statsıonaryndaǵy adamdarǵa medıtsınalyq baqylaý júrgizip jatyr.
Qalǵan jeke qorǵaný quraldary epıdemıologtarǵa, Taýarlar men qyzmetterdiń sapasy men qaýipsizdigin baqylaý, Іshki ister, TJ, Ulttyq gvardııa jáne taǵy basqa departament qyzmetkerlerine úlestirildi.
Sonymen qatar, betperdeler Open Almaty qoǵamdyq qabyldaý bólmesiniń qyzmetkerlerine de taratyldy. Óıtkeni olar táýlik boıy 1308 nómiri boıynsha turǵyndarǵa barlyq máseleler jóninde, sonyń ishinde koronavırýstyq ınfektsııanyń taralýyna qarsy áreket boıynsha keńes berýde.
Reıdtik is-sharalar kezinde 16 tonna spırt te tárkilendi. Sterıldeý kezinde dezınfektsııalaý quraly retinde paıdalanýǵa jaramdy bul spırt medıtsınalyq uıymdarǵa bólindi.
Jalpy qala ákimdigi koronavırýstyq ınfektsııanyń taralýyna jol bermeý úshin barlyq tıisti jumystardy jalǵastyrýda. Karantındi engizý týraly sheshimnen keıin 27 blok-bekette kúsh qurylymdary men medıtsınalyq uıym qyzmetkerleriniń jumysy jandandy. Qalada COVID-2019 oshaǵy anyqtaldy. Ol aımaqta dezınfektsııalyq is-sharalar júrgizilýde. Maqsat – koronavırýs indetiniń taralý tizbegin joıý. Óz kezeginde qala bıligi qala turǵyndaryn karantın rejımin qatań saqtaýǵa jáne árkimdi múmkindiginshe oqshaýlanýyna shaqyrdy.
Suraqtar boıynsha 1406 jáne Open Almaty 1308 nómirleri boıynsha táýlik boıy jumys isteıtin call-ortalyqqa habarlasyńyz. Kataraldy belgileri bar adamdar anyqtalǵan jaǵdaıda dereý qalanyń sanıtarlyq-epıdemıologııalyq qyzmetiniń táýlik boıy jumys isteıtin 382-33-50 nómirine habarlaý kerek.
