Alyp tıin Almatynyń sımvolyna aınalmaýy múmkin
ALMATY.QazAqparat - Almatydaǵy alyp tıin neniń qurmetine qoıylǵan? Ol qala sımvolyna aınala ma, álde ýaqytsha ornatylǵan nysan ba? Bul saýaldarǵa QazAqparat tilshisi joba uıymdastyrýshylarynan jaýap alǵan edi.
Almatylyqtardyń alyp tıin aınalasyndaǵy pikiri ekige jarylýda. Alyp ta bolsa, kózderi móldiregen janýardy bireýler jaqsy kórip jatsa, endi biri onyń nege kerek ekenin túsinbeı, ázilge aınaldyrýda.
Jobanyń bas uıymdastyrýshysy - qalany bezendirý jumystaryn júrgizetin FUNK kreatıvti agenttigi. Agenttiktiń uıymdastyrýymen «Almaty - teplyı gorod» jobasy aıasynda qala ákimdigine 11 sáýlet nysany usynylǵan. Qalany bezendirý maqsatynda agenttik ótkizgen baıqaýda Brıtandyq sýretshi Aleks Rınslerdiń jobasy úzdikter qataryna ilingen.
Atalǵan uıym basshysynyń aıtýynsha, brıtandyq sýretshi Aleks Rınsler - alyp janýarlardyń músinin jasaıtyn tanymal sheber. Onyń ınstallıatsııasy London men Shanhaı turǵyndaryna jaqsy tanys. Alaıda buǵan deıin tek túlkiniń pishinin jasap kelgen sýretshi «Almatylyq tıindi» tájirıbesinde alǵash qoldanyp otyr. Bıiktigi 13 metrge jetetin «dáý tıin» músini álem boıynsha alyp skýlptýralardyń biri sanalady.
«Aleks Rınsler ár qalada qandaı janýar ómir súretinin baqylap, sonyń nátıjesinde eko-art nysan jasap shyǵarady. Ol Almatyǵa kelip ekologııalyq oryndar - baqtar men saıabaqtardy aralap, onda kóbine qandaı janýarlar ómir súretinin zerttedi. Munda basqa qalalardaǵydaı mysyq ta, ıt te, tyshqan da jetedi. Alaıda tıin - Almatynyń tabıǵatyna tán tirshilik ıesi. Almaty shıpajaı aımaǵy retinde tanymal. Qala atmosferasyn turǵyndarǵa saıaly meken retinde tanıdy. Tıin - energııa men qozǵalystyń belgisi. Qala turǵyndary belsendiligimen erekshelenedi. Bireýi bir jumystyń izinde, endi biri bir jobany qolǵa alyp jatyr. Toqtamaıtyn qaınaǵan tirshlik. Demek bul janýar almatylyqtardyń tynys-tirshiliginen habar beredi»,-dedi «FUNK kreatıvti agenttigi» basshysy Maıra Izmaılova.
Eko-art nysan Eýropada trendke aınalǵan. Bul degenimiz - óner sheberleri qorshaǵan ortaǵa nazar salyp, ondaǵy tirshilik ıelerin ónerine arqaý etedi. Olar qala buryshynan alyp janýardyń músinin jasaý arqyly adamdardyń nazaryn ózge tirshlik ıelerine aýdarýdy maqsat etedi.
«Installıatsııanyń ishi bos. Qańqasy seısmıkalyq tózimdi temirden jasalǵan. Aǵash faneramen qaptalyp, syrty sabanmen oralǵan. Sabannyń bólikteri jelmen ushyp ketpesteı etip oralyp, órtten saqtaý úshin arnaıy suıyqtyqtarmen óńdelgen. Turǵyndardy alańdatyp otyrǵan máselelelerdiń barlyǵy barlyǵy aldyn ala oılastyrylǵan. Nysannyń ornyn avtordyń ózi tańdady. Osy oqıǵadan keıin qala turǵyndary Atakent kórme keshenine nazar aýdara bastaǵan sııaqty»,-deıdi Maıra Izmaılova.
Bul joba - memleket pen jeke seriktestiktiń birlesken jumysy. Uıymdastyrýshylar jumsalǵan shyǵynnyń shamasyn aıta almaǵanmen, nysannyń ýaqytsha ornatylǵanyn atap ótti.
«Bul óte qymbat joba, ony satyp alýǵa qarjy jetkiliksiz. Qazirgi jasalǵan kelisimshart 9 aıǵa ǵana jaraıdy. Odan keıin alyp tastalýy múmkin. Biraq alyp janýar qala turǵyndaryna unap, olardyń arasynda qımastyq sezimi oıanyp jatsa, avtormen aradaǵy sharttyń merzimin uzartýǵa bolady»,-dep atap ótti Maıra Izmaılova.
Janýar músinin jasaýǵa bir aıǵa jýyq ýaqyt jumsalǵan. Jobany júzege asyrýǵa 30-ǵa jýyq maman atsalysqan. Búgin saltanatty túrde ashylyp, qala turǵyndaryna resmı túrde tanystyryldy.
