Alıaskadaǵy kelissózder: Reseı jáne AQSh delegatsııasynyń quramy belgili boldy

ASTANA. KAZINFORM – Alıaskada ótetin Vladımır Pýtın men Donald Tramptyń kezdesýi 16 tamyzda astanalyq ýaqytpen 00:30-da bastalady. Alǵashqy bólimde eki el kóshbasshysy tek aýdarmashylardyń qatysýymen jeke sóılesedi, dep habarlaıdy Kazinform.

Reseı Prezıdentiniń kómekshisi ıÝrıı Ýshakovtyń aıtýynsha, sammıttiń negizgi taqyryby – Ýkraınadaǵy daǵdarysty retteý. Sonymen qatar taraptar beıbitshilik pen qaýipsizdikti qamtamasyz etý máselelerin, sondaı-aq ózekti halyqaralyq jáne óńirlik problemalardy talqylaıdy.

Kelissózder delegatsııalyq formatta «5+5» úlgisimen ótedi. Reseı delegatsııasyna Syrtqy ister mınıstri Sergeı Lavrov, Prezıdent kómekshisi ıÝrıı Ýshakov, Qorǵanys mınıstri Andreı Beloýsov, Qarjy mınıstri Anton Sılýanov jáne RF Tikeleı ınvestıtsııalar qorynyń basshysy Kırıll Dmıtrıev endi.

AQSh delegatsııasynyń resmı quramy Aq úı tarapynan áli jarııalanǵan joq. Degenmen «Henry Jackson Society» uıymynyń ǵylymı qyzmetkeri Darren Spınktiń boljamynsha, kelissózderge Memlekettik hatshy Marko Rýbıo, Qarjy mınıstri Skott Bessent, Qorǵanys mınıstri Pıt Hegset, ulttyq qaýipsizdik jónindegi keńesshi orynbasary Endrıý Beıker, Ortalyq barlaý basqarmasynyń dırektory Djon Retklıff, Aq úı apparatynyń basshysy Sıýzı Ýaıls, AQSh-tyń Reseıdegi ýaqytsha senimdi ókili Dj. Dýglas Daıkhaýs, Reseı boıynsha arnaıy ókil Stıv Ýıtkoff, Aq úı baspasóz hatshysy Kerolaın Lıvıtt jáne kommýnıkatsııalar jónindegi dırektor Stıven Chýng qatysýy múmkin.

Kelissózder qorytyndysy boıynsha Pýtın men Tramp birlesken baspasóz máslıhatyn ótkizedi.

Buǵan deıin AQSh Qarjy mınıstrligi Alıaskadaǵy sammıtti daıyndaý jáne ótkizý úshin qajet qarjylyq operatsııalardy 20 tamyzǵa deıin Reseıge qarsy sanktsııalardan ýaqytsha bosatqan bolatyn.