Alıaskada Pýtın men Tramptyń kezdesýine oraı qaýipsizdik sharalary kúsheıtildi

ASTANA. KAZINFORM — Alıaskanyń Ankorıdj qalasynda Reseı — AQSh sammıti qarsańynda qaýipsizdik sharalary kúsheıtildi, dep habarlaıdy TASS. 

Alıaskadaǵy Orys mádenı ortalyǵynyń dırektory Anna Vernanyń aıtýynsha, aımaqta qaýipsizdikke baqylaý artqan, amerıkalyq tarap kóptegen kúzetshini jumyldyrǵan, olar tipti tutas úılerdi ıelenip otyr.

Sondaı-aq, qalaǵa mártebeli qonaqtar kelip jatqanyn jetkizdi. Aldyńǵy kúni AQSh Densaýlyq saqtaý mınıstri kishi Robert Kennedı kelse, reseılik dıplomattardyń da kelgeni týraly aqparat bar.

Vernanyń sózinshe, aldaǵy sammıt shtat turǵyndary úshin mańyzdy oqıǵaǵa aınalǵan.

— Barlyq jergilikti telearna jańalyqtar toptamasyn osy sammıt taqyrybynan bastaıdy. Qonaq úıler lyq toly, sondyqtan jergilikti turǵyndar óz bólmelerin jalǵa berip jatyr, — dedi ol.

Onyń aıtýynsha, jergilikti bılik pen turǵyndar kelissózder úshin «qaýipsiz ári qolaıly jaǵdaı jasaýǵa» barynsha tyrysyp jatyr.

AQSh Federaldy azamattyq avıatsııa basqarmasynyń (FAA) dereginshe, Pýtın men Tramp kezdesetin kúni Ankorıdj qalasy ústindegi áýe keńistigi jabylady. Ushýǵa tyıym salynǵan aımaqtyń radıýsy 48,3 shaqyrymdy, bıiktigi 5,5 myń metr.

Eske sala keteıik, ótken aptada Tramp Pýtınmen kezdesý 15 tamyzda Alıaskada ótetinin habarlaǵan bolatyn.