Alıaskada 6,3 magnıtýdaly jer silkinisi boldy
ASTANA. KAZINFORM — Alıaskada Nıkolskı eldi mekeninen 167 shaqyrym batysta magnıtýdasy 6,3 bolatyn jer silkinisi tirkeldi, dep habarlaıdy Sınhýa.
Basylymnyń málimetinshe, jer silkinisi beısenbi kúni Grınvıch ýaqytymen saǵat 14:19-da (Astana ýaqytymen 19:19) bolǵan. Bul týraly AQSh Geologııalyq qyzmeti (USGS) habarlady.
Aldyn ala málimet boıynsha, jer silkinisiniń oshaǵy 52,81 gradýs soltústik endik pen 171,34 gradýs batys boılyqtaǵy núktede ornalasqan. Jer silkinisiniń oshaǵy 83 shaqyrym tereńdikte bolǵan.
Buǵan deıin jer silkinisi kezinde qalaı áreket etý kerek ekeni habarlanǵan bolatyn.
Sondaı-aq Indonezııa jaǵalaýynda magnıtýdasy 6,6 bolatyn jer silkinisi bolǵany týraly habarlanǵan.
