Alıaska sammıti aldynda Zelenskıı men Eýropa kóshbasshylary Tramppen onlaın-kezdesti

ASTANA. KAZINFORM – 13 tamyz kúni Eýropa elderiniń kóshbasshylary men Ýkraına prezıdenti Vladımır Zelenskıı AQSh prezıdenti Donald Tramppen vırtýaldy sammıt ótkizdi, dep habarlaıdy BBC News. 

Bul kezdesý Tramptyń Vladımır Pýtınmen Alıaskada ótetin aldaǵy sammıtiniń aldynda uıymdastyryldy jáne Eýropada ony yqtımal tepe-teńdik quraly retinde baǵalap otyr.

Ótken aptada Donald Tramp 2021 jyldan bergi alǵashqy amerıkalyq-reseılik sammıtke keliskenin málimdedi. Ol óziniń arnaıy ókili Stıv Ýıtkofftyń Máskeýdegi kelissózderde «aıtarlyqtaı ilgerileýge» qol jetkizgenin aıtty. Ýıtkoff 6 tamyzda Vladımır Pýtınmen kezdesken, bul AQSh-tyń Ýkraınadaǵy atysty toqtatý jónindegi ýltımatýmynyń merzimi aıaqtalýyna birneshe kún qalǵanda bolǵan.

14 tamyzda Ankorıdj qalasynda (Alıaska) ótetin bul kezdesý Tramptyń sózinshe, «soǵysty toqtatý jolyndaǵy synaq kezdesýi» bolmaq. Aq úıdiń baspasóz hatshysy Kerolaın Lıvıtt sammıtti «tyńdaı bilýge arnalǵan jattyǵý» dep sıpattady.

Reuters agenttiginiń habarlaýynsha, 13 tamyzdaǵy onlaın-kezdesýdiń maqsaty – AQSh prezıdentin Kıevtiń múddesine qaıshy keletin bitimnen saqtandyrý. Eýropalyq kóshbasshylar Tramptyń beıbit bastamalaryn qoldaıtynyn málimdeı otyryp, Ýkraınaǵa qatysty kez kelgen kelissóz onyń qatysýymen ǵana júrgizilýi tıis ekenin atap ótti.

Sammıtke Vladımır Zelenskıımen qatar Germanııa, Fınlıandııa, Frantsııa, Ulybrıtanııa, Italııa, Polsha, Eýropalyq odaq elderiniń basshylary jáne NATO Bas hatshysy Mark Rıýtte qatysty. Polsha atynan Eýropa kóshbasshylarymen kezdesýde premer-mınıstr Donald Týsk, al Tramppen onlaın-sammıtte jańa prezıdent Karol Navrotskıı boldy.

Vıdeokonferentsııadan keıin Eýropa kóshbasshylary men Zelenskıı Donald Tramp jáne AQSh vıtse-prezıdenti Djeı Dı Venspen bólek onlaın-kezdesý ótkizdi. Odan soń Ýkraınaǵa qoldaý kórsetý josparyn ázirleıtin elder tobynyń onlaın-otyrysy ótti.