Alýa Joldybalına: Senim keńesiniń ózine senim qalyptastyrý qajet
Ulttyq qoǵamdyq senim keńesi týraly el arasynda tolyq túsinik qalyptasyp úlgergen joq. Saıasattanýshy Alýa Joldybaeva keńes qyzmetine arnalǵan dóńgelek ústelde osyndaı pikir aıtty.
«Jalpy BAQ pen áleýmettik jelidegi pikirlerge zer salsaq, el arasynda Ulttyq keńes týraly naqty tolyq túsinik joq. Ulttyq keńesti ákimdikter men memlekettik organdar janyndaǵy qoǵamdyq keńestermen shatastyryp jatqandar kóp. Bul keńestiń respýblıkalyq deńgeıde jumys isteıtinin, onyń Ulttyq statýsy bar ekenin el uqpaı jatqan sııaqty. Ásirese, aımaqtarda osyny elge túsindirý qajet», - deıdi sarapshy.
Onyń oıynsha, Ulttyq keńestiń maqsaty men mindeti elge aıqyn emes. Alýa Joldybalına keńestiń jumys formatynda qatysty da óz oıyn bildirdi.
«Bir sózben aıtqanda, Senim keńesiniń ózine senim qalyptastyrý qajet. Jarlyq boıynsha keńestiń jumys organy - Prezıdent Ákimshiliginiń bólimshesi. Biz Eýropadaǵy, Amerıkadaǵy elderdiń, Azııada Malaızııanyń tájirıbelerine taldaý jasadyq. Biz mynadaı úsh baǵytty usynar edik.
Birinshiden, azamattardyń aryzdarynyń, shaǵymdary men saýaldarynyń naqty júıesin jınaqtaý qajet. Kez kelgen memlekettik organdarǵa túsetin aryz-shaǵymdardy da osy topqa jınaqtaý kerek. Ekinshiden, ashyq jáne jabyq tyńdaýlar ótkizýdi usynamyz. Úshinshiden, jumys toptary men jumys organy «azamattyq jıýrı» sııaqty jańa tehnologııalardy paıdalanǵany abzal. Tórtinshi kezekte áleýmettik jeli arqyly dıalog júrýi kerek. Osy tórt formatqa Prezıdent Ákimshiligi nazar aýdaryp, keńes músheleriniń jumysyn qamtamasyz etýi kerek. Keńestiń quramy óte oryndy iriktelgen. Tek endi sol quramnyń jumysyn qamtamasyz etý qajet», - dedi saıasattanýshy.
