Alýa Joldybalına: Ulttyq jobalar aımaqtardyń áleýetin tolyq asha almaı jatyr
ASTANA. KAZINFORM – Aımaqtardyń kún tártibin kásibı turǵyda zertteıtin saraptama ortalyqtar qalyptasý kerek. Prezıdent janyndaǵy Qazaqstan strategııalyq zertteýler ınstıtýty dırektorynyń orynbasary Alýa Joldybalına osyndaı ınstıtýtardyń joqtyǵynan memleket qabyldaǵan sheshimder el kútken nátıjelerdi bermeı jatqanyn aıtady.
— Eldegi saraptama ortalyqtary aımaqtardyń kún tártibin eskere otyryp jumys isteý kerek. Óıtkeni bizdegi saraptama ujymdarynyń bári jalpy Qazaqstanmen aınalysady. Ortaq problemany zertteýge kúsh salady. Biraq aımaqtaný jaǵy aqsap jatyr. Mysaly, bizde Mańǵystaý oblysynyń, Qostanaı oblysynyń, Túrkistan oblysynyń sarapshy mamandary bolý kerek. Óıtkeni aımaqtardyń búgingi áleýeti, problemasy ár túrli. Biz sheshim qabyldaǵan kezde ulttyq deńgeıde qabyldaımyz. Mysaly salalardy damytý úshin birneshe jyldyq ulttyq jobalardy qabyldaımyz. Onyń bári ulttyq aýqymdaǵy jumystarǵa arnalǵan. Biraq bizde aımaq bar ǵoı. Jekelegen aımaqty qajettiligi, suranysy, kún tártibi óz aldyna bólek álem. Sondyqtan aımaqtaǵy sarapshylardyń áleýetin qalaı ósiremiz degen suraqtarǵa jaýap tabýymyz kerek. Búgingi jıynnyń bir maqsaty osy, — deıdi sarapshy.
KSZI ókili aımaqtardaǵy boljaý jáne taldaý ortalyqtarynyń kúshimen óńirlerdiń tynys-tirshiligin qalt jibermeı baǵym otyrý múmkin emes ekenin aıtady.
— Iá, boljaý jáne taldaý ortalyqtary bar. Olardyń jumysy sapasyz dep aıtýdan aýlaqpyn. Ol ujymdar negizinen áleýmettik zertteýlermen shektelip jatady. Al óńirde zertteýdi qajet etetin sala jeterlik. Sonyń bárin qamtý úshin bir aımaqta menshik nysany árkelki birneshe taldaý ortalyǵy bolý kerek, — deıdi Alýa Joldybalına.
Aıta keteıik, búgin Astanada Prezıdent janyndaǵy Qazaqstan strategııalyq zertteýler ınstıtýtynyń uıymdastyrýymen eldegi saraptamalyq ortalyqtardyń basshylary bas qosty. Olar eldiń kún tártibin qalyptastyrýdaǵy saraptama ortalyqtarynyń rólin talqylap, aldaǵy baǵyttaryn aıqyndady.