Alýa Nurman shahmatshylardyń álemdik reıtınginde úshinshi orynǵa kóterildi
ASTANA. KAZINFORM — Alýa Nurman 20 jasqa deıingi shahmatshylardyń álemdik reıtınginde úshinshi orynǵa kóterildi, dep habarlaıdy Informsports.kz.
Halyqaralyq shahmat federatsııasy (FIDE) 20 jasqa deıingi qyzdar arasyndaǵy álemniń úzdik 100 shahmatshysynyń jańartylǵan reıtıngin jarııalady.
19 jastaǵy qazaqstandyq Alýa Nurman reıtıngine 7 upaı qosyp, jalpy kórsetkishin 2442 upaıǵa jetkizdi. Sonyń nátıjesinde ol álemdik reıtıngte 4-orynnan úshinshi orynǵa kóterildi.
Reıtıng kóshin 2465 upaımen ýkraınalyq Anastasııa Gnatyshın bastap tur. Ekinshi orynda 2443 upaımen Anna Shýhman (FIDE/Reseı) ornalasqan. Alýa Nurman odan nebári bir upaıǵa ǵana qalyp keledi.
Qazaqstandyq shahmatshy 2025 jylǵy blıtsten Azııa chempıony atanǵan. Sondaı-aq maýsym aıynda Gonkongta ótken komandalyq álem chempıonatynda jeke taqtadaǵy básekede blıtsten altyn, al rapıdten kúmis medal jeńip aldy.
Jańartylǵan reıtıngke Qazaqstannyń basqa da shahmatshylary endi. Amına Qaıyrbekova 2353 upaımen 13-orynda tur. Elnaz Qalıahmet 2304 upaımen 22-orynǵa jaıǵassa, Zarına Nurǵalıeva 2302 upaımen kelesi, 23-orynda ornalasqan. Al Marııa Holıavko 2217 upaımen 60-oryndy ıelendi.
Aıta keteıik, Almatyda ýnıversıtetter arasyndaǵy tuńǵysh FIDE álem chempıonaty ótedi.
