Alýa Balqybekova: Azııa oıyndarynda chempıony bolý armanym oryndalmady
NAGOıA.KAZINFORM — Qazaqstandyq boksshy Alýa Balqybekova Japonııada ótip jatqan HH jazǵy Azııa oıyndarynda qola júldemen jarys jolyn aıaqtady. Sportshy jartylaı fınaldyq jekpe-jekten keıin Kazinform tilshisine shaǵyn suhbat berip, jarys nátıjesi týraly pikir bildirdi.
Otandyq boksshy jeńis úshin bar kúshin salǵanyn aıtty.
- Azııa oıyndaryna jaqsy daıyndyqpen, jeńis úshin keldik. Fızıkalyq jáne taktıkalyq turǵyda tolyq daıyn boldyq. Alaıda, qazir komandadaǵy jaǵdaı kúrdeli, ótken jepe-jekterde qyzdarymyz jeńilip qaldy. Elimizge altyn medal syılaımyn, alǵashqy Azııa oıyndary chempıony atanamyn dep armandadym. Ókinishke oraı qolymnan kelmedi. Bul maǵan tájirıbe jáne sabaq boldy. Sebebi, alda taǵy álem chempıonaty, Azııa chempıonaty sııaqty lıtsenzııalyq dodalar bar,- dedi ol.
Sportshy qarsylasy jáne tóreshi sheshimi týraly pikir bildirdi.
- Qarsylasym týraly jaqsy bilemin. Alaıda, osyǵan deıin basqa salmaqta bolǵandyqtan kezdespedik. 48 keli salmaqta Nazym Qyzaıbaımen judyryqtasyp, jeńiske jetken. Álem jáne Azııa chempıonattarynda joǵary nátıje kórsetip júrgen tájirıbeli sportshy. Al tóreshiler jáıli aıtar bolsam, rıngte esepke nazar aýdarýǵa ýaqytym bolmady. Sebebi men tek jeńis úshin judyryqtastym, bapkerlerim bergen tapsyrmany jáne taktıkany jaqsy oryndaýǵa tyrystym,- dedi Alýa.
Sóz sońynda, qazaqstandyq boksshy qoldaý kórsetken jankúıerlerge alǵys aıtyp, aldaǵy baıraqty dodalarǵa myqty bolyp oralýǵa senim bildirdi.
Osyǵan deıin habarlaǵanymyzdaı, Alýa Balqybekova Azııa oıyndarynyń áıelder arasynda 51 keli salmaqta jartylaı fınalda vetnamdyq Tı Ta Ngýennen jeńilip, qola júlde jeńip aldy.
Sonymen qatar, qazaqstandyq boksshylar Mahmýd Sabyrhan (55 keli), Tórehan Sabyrhan (70 keli), Natalıa Bogdanova (75 keli) jáne Aıbek Oralbaı (90 keliden joǵary) búgin jartylaı fınalda óner kórsetedi.
