Altynshash Jaqııanovanyń «Meniń Muqaǵalıym» dep atalatyn zertteý kitaby jaryq kórdi
ALMATY. 4 tamyz. QazAqparat /Erlik Erjanuly/ - Almatydaǵy «QazAqparat» baspasynan Altynshash Jaqııanovanyń «Meniń Muqaǵalıym» dep atalatyn jańa kitaby jaryq kórdi. Bul Almaty oblysy Qapshaǵaı qalasynda oqytýshy bolyp jumys jasaıtyn onyń 13-shi kitaby.
«Meniń Muqaǵalıym» dep atalatyn bul kitapqa óleńderim, aqyn shyǵarmashylyǵy týraly pedagogıkalyq, ádistemelik oqý materıaldary men oqýshylarymnyń óleńderi toptastyrylǵan. Qazaq poezııasynda ózindik qoltańba qaldyryp, ony jańa beleske kótergen Muqaǵalı esimi búginde kúlli qazaqqa máshhúr. Onyń óleńderin men de bala jasymnan jattap óstim. Shyǵarmalaryn basyma jastana oqıtyn súıikti aqynyma arnalǵan bul kitapty «Meniń Muqǵalıym» dep ataýym sondyqtan», - deıdi Altynshash Jaqııanova.
Aqyn shyǵarmashylyǵyna eliktep 10 jasynan bastap óleń jaza bastaǵan onyń aıtýynsha, Muqaǵalıdyń týǵan aýyly Qarasazdy kórýdi ol kishkentaı kezinen arman etken kórinedi. Ol armany bıyl aqynnyń 80 jyldyq toıynda júzege asqan. Qarasazdaǵy Muqaǵalı Maqataevtyń jóndeý jumystarynan keıin qaıta ashylǵan ádebı-memorıaldyq murajaıyn kórip, tamashalap shyqqan soń onyń muraǵattar qoryna óz qarjysyna shyǵarǵan «Meniń Muqaǵalıym» dep atalatyn kitabyn syıǵa tartqan. «Bul men úshin erekshe este qalatyn kún boldy. Ulan-asyr toı jasap, at shaptyrǵan halyqtyń yqylas-peıili meni erekshe tánti etti. Aqynyn ulyqtap, osyndaı qoshemet-qurmet kórsetip jatqan eldiń erteńi jarqyn, bolashaǵy kemel ekeni kúmánsiz», - deıdi A. Jaqııanova.
