«Altynemelde» alǵash ret fototuzaqqa qar barysy ilindi
NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev «Altynemel» memlekettik ulttyq tabıǵı parkinde alǵash ret kózge túsken ilbistiń vıdeosyn jarııalady, dep habarlaıdy QazAqparat tilshisi.
«Jaqsy jańalyqpen bóliskim kelip otyr. «Altynemel» memlekettik ulttyq tabıǵı parkinde alǵash ret qar barysy kózge tústi. Jyrtqysh fototuzaq obektıvine ilingen. Orta Azııada sırek kezdesetin sútqorekti sońǵy ret kóktemde «Saıram Ógem» ulttyq parkinde baıqalyp edi», - dep jazdy mınıstr Twitter paraqshasynda.
Onyń aıtýynsha, joıylyp ketý aldynda turǵan sulý janýardyń sany álemde bar bolǵany 4 myńdaı ǵana. Qazaqstan aýmaǵynda 120-130 ilbis bar. BUU DB Qazaqstannyń erekshe qorǵalatyn 13 aımaǵyna buǵan deıin 294 fototuzaq ornatqan.
«Barystyń kózge túsýi - erekshe qubylys. Biz sırek kezdesetin janýarlardy barynsha qorǵaýymyz kerek. Ekologııa, geologııa jáne tabıǵı resýrstar mınıstrligi bul úshin birqatar naqty sharalardy qabyldap, júzege asyrady», - dep jazdy mınıstr.
Eske sala ketsek osy jazda Aqsý-Jabaǵyly tabıǵı qoryǵynda ilbis fototuzaqqa ilingeni habarlanǵan bolatyn.
