Altynemel ulttyq parkiniń asha tuıaqty janýarlary Іle-Balqash rezervatyna kóshiriledi
«Búginde Іle-Balqash rezervatyn qurý boıynsha negizgi jumystar aıaqtaldy. Onyń aýmaǵy 415 myń gektardy quraıdy. 2018 jyly rezervatty ustaýǵa respýblıkalyq bıýdjetten 117 mıllıon teńge, materıaldyq-tehnıkalyq jabdyqtaýy úshin - 73 mıllıon teńge bólinedi. Odan bólek, BUU Damý baǵdarlamasy aıasynda kelesi jyly 19 mıllıon teńge, 2019 jyly - 17 mıllıon teńge bólinedi», - dep atap ótti M.Aınabekov QR AShM Jolbarystardy qalpyna keltirý jumystaryna arnalǵan jınalysta.
Komıtet tóraǵasynyń aıtýynsha, Іle-Balqash rezervatyn qurý baǵdarlamasy 20 jylǵa josparlanǵan. Alǵashqy 5 jyldyqta toǵaıly jáne jaıylma ormandardy qalpyna keltirý men tálimbaqtar qurý jumystary júrgiziledi. Ekinshi kezeńde jolbarystarǵa arnalǵan qorektik bazany qurý, ıaǵnı tuıaqty janýarlar qalpyna keltiriledi.
«Rezervat qyzmetiniń alǵashqy kezeńinde tabıǵı keshender men nysandardy qorǵaý, jaıylma ormandardy qalpyna keltirý jáne buqar buǵysyn jersindirý jumystaryn júrgizemiz. Atalǵan jumystardy 2020 jylǵa deıin aıaqtaýymyz qajet», - dep óz sózin tolyqtyrdy M.Aınabekov.
Eske sala ketsek, 2018 jyldyń 1 qańtarynda jolbarystar tirshilik etetin «Іle-Balqash» memlekettik tabıǵı rezervaty óz jumysyn bastaıdy. Qazaqstandaǵy jolbarystardyń reıntrodýktsııasy boıynsha sharalardy júzege asyrý maqsatynda QR Aýyl sharýashylyǵy mınıstrligi men Reseıdiń Búkilálemdik jabaıy tabıǵat qory arasynda yntymaqtastyq týraly memorandým bekitilgen.