«Altynemel» týraly fılm Qyrǵyzstanda kórsetiledi
ASTANA. QazAqparat - Qazaqstandyq «Altynemel» týraly fılm Qyrǵyzstanda kórsetiledi, dep habarlaıdy QazAqparat kınostýdııanyń baspasóz qyzmetine silteme jasap.
Qyrkúıektiń 3-7 aralyǵynda birinshi Halyqaralyq «Móńgú» atty etno-ekologııalyq fılmder kınoforýmýynyń baǵdarlamasy aıasynda Qazaqstanda túsirilgen «Altynemel» derekti fılmi ekrandalady.
Atalǵan týyndy Altynemel memlekettik ulttyq saıabaǵynyń baı tabıǵaty týraly baıandaıdy. Derekti fılmniń avtory - tanymal fotograf-natýralıst Oleg Belıalov.
«Móńgú» forýmynyń kórsetilimderi Ystyqkól oblysy Qyrchyn jaılaýynda ashyq aspan aıasyndaǵy arnaıy alańdar men kıiz úılerde ótedi. Aıta ketsek, birinshi «Móńgú» kınoforýmynyń baǵdarlamasy sheńberinde 20 fılm kórsetiletin bolady. Olar «Úzdik fılm», «Úzdik rejısser» jáne «Qazylar alqasynyń arnaıy júldesi» nomınatsııalary boıynsha baq synaıdy.
«Móńgú» kınoforýmynyń basty maqsaty - tabıǵı resýrstardy saqtaý, qorshaǵan ortany jáne bıo-mádenı murany qoǵaý boıynsha qozǵalystardy qoldaý bolyp tabylady. Forým aıasynda arnaıy kórsetilimder, semınarlar jáne halyqaralyq kınematografıster, ekolog pen sarapshylardyń qatysýymen sheberlik saǵattar ótkiziledi», - delingen habarlamada.
Esterińizge sala ketsek, «Altynemel» derekti fılminiń alǵashqy kórsetilimi byltyr qarasha aıynda «Qazaqfılm» kınostýdııasy QR Tuńǵysh Prezıdenti-Elbasy qorymen birlesip, Qazaq derekti kınosynyń kúnderi aıasynda ótken bolatyn. Sondaı-aq atalǵan týyndy QHR-nyń Taıchjoý qalasynda ótken Kıno jáne týrızm salasyndaǵy azııalyq óner aptalyǵynda kórsetilip, «Sheteldiń úzdik derekti fılmi» júldesimen marapattaldy.
