«Altynemel» týraly derekti fılm kórermenge jol tartty
ALMATY. QazAqparat - Qazaqstannyń kórkem tabıǵatyn nasıhattaıtyn taǵy bir derekti fılmniń tusaýy kesildi, dep habarlaıdy QazAqparat tilshisi.
«Qazaqfılm» kınostýdııasy «Altynemel» atty derekti fılmdi tanystyrdy. Fılmniń avtory tanymal fotograf-natýralıst Oleg Belıalov. Atalǵan derekti kartına Altynemel memlekettik ulttyq saıabaǵynyń baı tabıǵatyn kórsetedi. Túsirýshi toptyń aıtýynsha, kartına baqylaý ádisi arqyly, 2017 jyldyń jyldyń kóktemi men jaz mezgilderinde túsirilgen.
«Osy taqyrypta derekti kıno túsirý úshin aıqyn maqsatyń men operatorlyq sheberlik bolýy kerek. Onyń ústine tabıǵat tanýda tájirıbe bolýy kerek. Stsenarıı tek bastapqy ıdeıa retinde júredi. Stsenarıı asa mańyzdy emes. Óıtkeni, bul aldyn-ala bári kelisilip qoıǵan, naqty kisige arnalǵan portret kartına emes. Bul - tosyn oqıǵaǵa toly tabıǵat týraly fılm. Stsenarııde qııaldap bárin jazýǵa bolady, al ony túsirý ońaıǵa soqpaıdy. Fılmdi kórkemdeı túsýge, qysqa sıýjetterdiń kólemdi fılmge aınalýyna montaj da kóp yqpal etti. Jáne de ulttyq saıabaqtyń tynysyn berýge mýzyka men dybystaý úrdisi óz úlesin qosty», - dedi Oleg Belıalov.
«Bul - Oleg Belıalovtyń rejısser retindegi alǵashqy fılmi. Belıalov anamalıstıka janrynda Qazaqstandaǵy úzdik maman», - delingen Qazaqfılm habarlamasynda.
«Tabıǵat jaıly fılm túsirý qajettigi týyndady, al anamalıstıka janrynda túsirý mol tájirıbeni talap etetin bolǵan soń, tańdaý maǵan tústi. Bul janrda men 80-90 jyldary kóp eńbek etkem. Altynemel Almatyǵa jaqyn ornalasqan jáne jabaıy janýarlardy esh qıyndyqsyz ushyrastyrýǵa bolatyn birden-bir ulttyq saıabaq bolǵandyqtan, sol mekendi túsiremiz dep sheshtik», - deıdi rejısser.
