«Altynemel» saıabaǵy týraly fılm kórermenge jol tartty
ASTANA. QazAqparat - Búgin Almatyda «Qazaqfılm» kınostýdııasy QR Tuńǵysh Prezıdenti-Elbasy qorymen birlesip, qazaq derekti kınosynyń kúnderi aıasynda «Altynemel» atty derekti fılmniń tusaýkeserin ótkizdi. Fılmniń avtory tanymal fotograf-natýralıst Oleg Belıalov. Bul týraly kınostýdııanyń baspasóz qyzmeti habarlaıdy.
Atalmysh derekti kartına Altynemel memlekettik ulttyq saıabaǵynyń baı tabıǵaty týraly baıandaıdy. Kartına baqylaý ádisi arqyly, qysqa ýaqytta - ústimizdegi jyldyń kóktemi men jaz mezgilderinde túsirilgen.
«Derekti kınonyń osy salasynda eń mańyzdysy - túsiretin obektini jaqsy bilý men operatorlyq ónerdi meńgerý. Onyń ústine tabıǵatty tanı bilý men tájirıbe de mańyzdy. Stsenarıı tek bastapqy ıdeıa retinde júredi. Stsenarıı asa mańyzdy emes. Óıtkeni bul aldyn-ala bári kelisilip qoıǵan, naqty kisige arnalǵan portrettik kartına emes. Bul tosynǵa toly tabıǵat týraly fılm. Stsenarııde qııaldap bárin jazýǵa bolady, al ony túsirý ońaıǵa soqpaıdy. Fılmge aıryqsha kórkemdik berip, qysqa sıýjetterdiń kólemdi fılmge aınalýyna montaj kezeńi kóp yqpal etti. Jáne de ulttyq saıabaqtyń tynysyn berýge mýzyka men dybystaý úrdisi óz úlesin qosty», - dedi Oleg Belıalov.
Bul avtordyń rejısser retindegi alǵashqy fılmi.
«Tabıǵat jaıly fılm túsirý qajettigi týyndady, al anamalıstıka janrynda túsirý mol tájirıbeni talap etetin bolǵan soń, tańdaý maǵan tústi. Bul janrda men 80-90 jyldary kóp eńbek etkem. Altynemel Almatyǵa jaqyn ornalasqan jáne jabaıy janýarlardy esh qıyndyqsyz ushyrastyrýǵa bolatyn birden-bir ulttyq saıabaq bolǵandyqtan, sol mekendi túsiremiz dep sheshtik», - dep qosty rejısser.
