Altynbek Qorazbaev: Ótkenimizge qarap, aqyl toqtataıyq, aǵaıyn
NUR-SULTAN. QazAqparat – Qazaqstannyń Halyq ártisi Altynbek Qorazbaev Qordaıdaǵy janjalǵa baılanysty pikirin bildirip, kópti aýyzbirshilikke shaqyrdy, dep habarlaıdy QazAqparat tilshisi.
«Qadirli halqym! Jambyl óńirindegi jerlesterim! Kesheli beri aıqaı-shý kóbeıip, estýimshe ultaralyq kelispeýshilik bolyp jatqan kórinedi. Aınalaıyndar, biz qazaq degen keń halyqpyz. Qushaǵymyz da keń. Biz óte sanaly da aqyldy, barlyq jaǵynan – saýda bolsyn, óner bolsyn beıim halyqpyz. Kishkene sabyr saqtańyzdar. El ishinde bir-eki buzyq bolýy múmkin. Ol bizde de, basqada da bar. Baıaǵy soǵys kezinde nemisterdi, sheshenderdi, qarashaılar men ýkraındardy qushaǵymyzǵa alǵan elmiz. Ákem tipten eki bólmeli kishkentaı qorjyn tamyna alty balasymen birdeı Muhamet degen qarashaı azamatyn panalatqan. Al olar qazir qazaq dese janyn beredi. Ótkenimizge qarap, aqylǵa toqtaıyq», - deıdi Altynbek Qorazbaev.
Qazaqstannyń Halyq ártisi zaıyrly ári quqyqtyq memlekette istiń aq-qarasy anyqtalatynyna senim bildirdi.
«Judyryq bizdiki eken dep, óktemdik jasamaı-aq qoıaıyq, aǵaıyn. Aqylǵa toqtańdar. Dúngender - eńbekqor. Baıaǵyda esimde Jambyl oblysyndaǵy Ýlanovka degen aýylda dúngennen Keńes odaǵynyń eńbek eri boldy. Jumys dese bular qulshyna kirisetin. Jer tyrmalap jylyna úsh-tórt ret ónim alyp jatatyn. Keshegi Londonda ótken Olımpıada oıyndarynda osy dúngennen sportshylar qazaqtyń kók týyn jelbiretip, álemge qazaqty pash etti. Almatyda dúngennen kompozıtor dosym bar. Ol kisi qazaq dese ishken asyn jerge qoıady. Tatý-tátti ómirimizben basqa elge úlgimiz. Kúnde shý men aıqaı bolyp jatsa, munyń arty jaqsylyqqa aparmaıdy. Aqylǵa kelińder, aınalaıyndar», - dep sózin aıaqtady Altynbek Qorazbaev.
Buǵan deıin Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles bolǵanyn habarlaǵan bolatynbyz.
Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirdi.
«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.
