Altynbek Baıandın: Elbasy bastamasy baspana máselesin sheshe almaǵan azamattarǵa úmit uıalatyp otyr
Onyń aıtýynsha, Elbasymyz 5 áleýmettik bastamada arqyly turǵyndardyń álemettik jaǵdaıyn kóterýdiń kelesi belesine jol ashyp berdi.
«Elbasy Nursultan Nazarbaevtyń qatysýymen ótken Qazaqstan Respýblıkasy Parlamenti qos palatasynyń keshegi otyrysyn bastan aıaq tyńdap shyqtym. Onda alǵa qoıylǵan 5 áleýmettik bastamada aǵymdaǵy jyldan bastap 7 paıyzdyq ıpotekalyq nesıe berile bastaý qajettigi aıtyldy. Shynymen baspananyń zaryn tartyp júrgen adamdardyń biri retinde bul jańalyqty asa qýanyshpen qabyldadym. Bul bastama baspana máselesin sheshe almaı júrgen azamattarǵa úmit uıalatyp otyr», - deıdi Altynbek Baıandın.
Onyń aıtýynsha, osyǵan deıin elimizde úkimet tarapynan úı-kúısiz júrgen jandardy «Qoljetimdi baspana - 2020» memlekettik baǵdarlamasy aıasynda baspanamen qamtamasyz etý qolǵa alynǵan bolatyn. Ony júzege asyrýdyń bir joly «Qazaqstannyń turǵyn úı qurylys jınaq banki» aktsıonerlik qoǵamyna júktelgen edi. Bul tutynýshylarǵa usynylyp otyrǵan baspanaly bolýdyń jańa ári ońtaıly joly bolyp sanalady. Bul týraly Memleket basshysy Nursultan Nazarbaev óziniń halyqqa arnaǵan Joldaýynda Úkimetke jalǵa beriletin úılerdiń sanyn kóbeıtý úshin arnaıy baǵdarlama ázirlep, ony júzege asyrý týraly tapsyrma bergen bolatyn.
Oǵan qosa, sońǵy jyldary «Nurly jer», «Nurly jol» sııaqty memlekettik baǵdarlamalar qolǵa alyna bastady.
Elbasynyń bul jolǵy bastamasy halyqqa jeńildetilgen nesıe berý arqyly turǵyndardyń páterge degen muqtajdyǵyn tolyq sheship bermese de, kezektiń ilgeri jyljıtynyna naqty arqaý bolyp otyr.
«Prezıdent bastamalary jańa zańdar, jańa normatıvtik-quqyqtyq aktiler qabyldaý arqyly sapaly túrde júzege asyrylsa, nur ústine nur bolar edi. Bul baspanaǵa muqtaj turǵyndarǵa jeńildetilgen ıpotekany ekinshi deńgeıli bankter arqyly da alýǵa múmkindik berer edi. Jasyrtyny joq, búgingi tańda Qazaqstannyń turǵyn úı qurylys jınaq banki arqyly ǵana jeńildetilgen ıpotekalyq nesıe berilip jatyr. Al, bul banktiń barlyq óńirde bólimsheleri joq. Óz basym baspana máselesin bir bankke qaratyp qoıǵan durys emes dep esepteımin. Quny kem degende 6-7 mıllıon teńge turatyn avtokólikterdi jeńildetilgen paıyzdyq kórsetkishtermen ekinshi deńgeıli bankter nesıelep jatyr ǵoı. Halyqty avtokólikten góri, eń birinshi baspana máselesi tolǵandyrady. Sondyqtan, bir ǵana Qazaqstannyń turǵyn úı qurylys jınaq bankine qarap otyrmaı, ekinshi deńgeıli bankterdi osyǵan tartý quptarlyq. Halyqqa qaı bank yńǵaıly bolsa, sodan jeńildetilgen ıpotekalyq nesıe alǵany óte mańyzdy. Sonda kezek te tez jyljıdy ári bankterdiń arasynda báskelestik týyp, qyzmet sapasy da, tipti, turǵyndardyń bankterge degen senimi de arta túser edi», - dedi Altynbek Baıandın.
