«Altyn júrek» ıesi kúnine 200 almatylyqty tegin tamaqtandyrmaq

ALMATY. QazAqparat - Almatyda qoǵam belsendisi, «Altyn júrek» syılyǵynyń ıegeri Rasıma Temerbaeva «Tegin túski as» jobasy aıasynda tamaq taratatyn ekinshi pýnkt ashpaqshy, dep habarlaıdy QazAqparat tilshisi.  

Osylaısha qaıyrymdy áıel kúnine 200 adamdy tegin tamaqtandyratyn bolady. Onyń aıtýynsha, ekinshi núkteni ashýǵa demeýshi tabyldy.

«Bir qaıyrymdy jan qol ushyn sozdy. Atyn aıta almaımyn. Endi tek qana uıymdastyrý jumystary ǵana aldy. Jergilikti organnan ruqsat alý degen sııaqty. Ol núktede de 100 tarta muqtaj adam tegin as ishetin bolady», - dedi Rasıma Temerbaeva.

Onyń aıtýynsha, jýrnalısterdiń jarııalaýynan soń  kómek qolyn sozyp jatqandar óte kóp.

«Ótken aptadan beri 500 myń teńge kóleminde aqshalaı jınaldy. 2 aptaǵa jetetin azyq-túlik qoryn aldyq. Sýyqtyń beti qaıtqan soń, kelýshilerdiń sany kúrt artady. Shamamyz kelgenshe barlyǵyn qamtyp jatyrmyz», - dedi R.Temerbaeva.

Aıta ketý kerek, Aımanov - Jandosov kósheleriniń qıylysyndaǵy dúńgirshekke 16:00-17:00 arasynda 100-ge tarta zeınetker, turmysy tómen otbasylar, qańǵybastar kelip, tegin as ishedi.

Qoǵam qaıratkeri Rasıma Temerbaeva osy jobasy arqyly  «Ardagerlerge kórsetken qamqorlyǵy úshin» «Altyn júrek» syılyǵynyń laýreaty atanǵan bolatyn.