«Altyn jaýynger» anımatsııalyq fılmi jaryqqa shyǵady
Elordadaǵy «Qazaqstan» kontsert zalynda QR Mádenıet jáne sport mınıstrliginiń keńeıtilgen alqa májilisi bastaldy. Májiliste mınıstr Arystanbek Muhamedıuly óz basqarýyndaǵy vedomstvonyń 2018 jylǵy atqarylǵan jumysy men jospary týraly baıandama jasaýda. Mınıstr Mádenıet jáne sport mınıstrligi qyzmetiniń negizgi baǵyttary «Rýhanı jańǵyrý» memlekettik baǵdarlamasy men Prezıdenttiń «Uly dalanyń jeti qyry» baǵdarlamalyq maqalasynda belgilengenin atap ótti.
«National Geographic, BBC World news, Discovery, Viasat History jetekshi álemdik arnalarmen birlesip, álemdegi tarıhı-mádenı murany keńinen nasıhattaý jáne kópshilikke taratý úshin Qazaqstannyń kıeli obektileri týraly tolyq metrajdy tarıhı derekti fılmder tsıkli shyǵarylǵan bolatyn. Atap aıtqanda, «Kúltegin. Jańa kózqaras», «Qoja Ahmet ıAsaýı jáne Aısha bıbi mavzoleıleri», «Kóshpendiler jeri» sekildi tarıhı fılmder efırge shyqty», - deıdi mınıstr.
Arystanbek Muhamedıulynyń aıtýyna qaraǵanda, 2019 jyly «Botaı», «Táńirshildik kúntizbesi», «Uly Dalanyń ejelgi metallýrgııasy» serııalary jaryqqa shyǵady.
«AQSh, Ulybrıtanııa, Japonııa, Italııa, Frantsııa, Avstrııa, Qytaı jetekshi murajaılaryna Altyn adamnyń Dúnıejúzilik sherýiniń qorytyndysy boıynsha ǵylymı-zertteý fılmderiniń tsıkli men Altyn jaýynger týraly tolyq metrajdy anımatsııalyq fılm shyǵarylady», - dedi ol.
Mınıstr óz baıandamasynda atap ótkendeı, tarıh eskertkishteriniń ınfraqurylymyn damytýǵa erekshe kóńil bólinetinin aıtyp ótti. Onyń aıtýyna qaraǵanda, ótken jyldyń ózinde 3 respýblıkalyq «Bozoq», «Botaı» jáne «Saraıshyq» qoryq-murajaıy ashylyp, «Ulytaý», «Otyrar», «Tańbaly» murajaı-qoryqtarynda vızıt-ortalyqtardyń qurylysy bastalyp ketken.
